Janë bërë 21 vjet nga ndarja nga jeta e Anita Bitrit, këngëtares me zë të rrallë që preku zemrat e publikut shqiptar dhe që humbi jetën tragjikisht bashkë me vajzën dhe nënën e saj në Shtetet e Bashkuara të Amerikës.
E lindur në Sarandë më 1968, Anita u bë një nga figurat më të dashura të muzikës shqiptare gjatë viteve ’90 me hite që vazhdojnë të dëgjohen edhe sot si “Mos u nxito, mos u gabo”, “Dashuria e parë”, “Vetëm sytë e tu” dhe shumë të tjera që e bënë një ikonë të brezit të saj. Zëri i saj i ëmbël dhe interpretimi plot ndjenjë e kthyen në një prej artisteve më të pëlqyera të skenës shqiptare.
Pas shpërnguljes në SHBA, Anita po ndërtonte një jetë të re me vajzën e saj të vogël dhe nënën, ndërkohë që po përgatiste dy albume — një në shqip dhe një në anglisht. Por në tetor të vitit 2004 ndodhi tragjedia që tronditi komunitetin shqiptar në New York dhe gjithë publikun në vendlindje.
Gjatë punimeve për renovimin e banesës së saj në Staten Island, Anita kishte kontraktuar një kompani ndërtimi shqiptare. Punëtorët kishin mbyllur aksidentalisht gypin e ventilimit të sistemit të ngrohjes, çka shkaktoi grumbullimin e monoksidit të karbonit në shtëpi. Ajo, vajza e saj e vogël dhe nëna, humbën jetën në gjumë nga helmimi.
Pas këtij incidenti, shteti i New York-ut ndryshoi rregullat për sigurinë e banesave, duke bërë të detyrueshme instalimin e detektorëve të monoksidit të karbonit në çdo shtëpi — një masë që mori emrin “Rregulli i Anitës”.
Edhe sot, pas më shumë se dy dekadash, kujtimi i saj mbetet i paharruar, si një kujtesë e dhimbshme e një jete të ndalur në kulmin e talentit dhe dashurisë për muzikën. /Prive By Liberta Spahiu.
