Reperi i njohur mendoi se mund të na linte në suspans kur vendosi të ndante një detaj mjaft interesant për festën e Shën Valentinit.
Getinjo la të nënkuptohet qartë se ka gjetur dashurinë, duke publikuar një foto romantike krah partneres së tij, por duke u kujdesur maksimalisht që të mos ia zbulonte fytyrën. Por, çfarë kuptimi do të kishte shoubizi nëse nuk do të ndërhynim ne për të bashkuar pikat? Nuk do të ishte aspak një problem i vërtetë, sepse detektivët tanë nuk flenë kurrë kur është puna për të zbuluar identitete.
Burime të sigurta pranë redaksisë së Prive By Liberta Spahiu bëjnë të ditur ekskluzivisht se vajza misterioze që i ka vjedhur zemrën reperit është Era Berisha.
Ajo është një personazh mjaft i njohur dhe aktiv në rrjetet sociale, veçanërisht në platformën TikTok ku numëron një numër të madh ndjekësish dhe pëlqimesh.
Lidhja e tyre mësohet se ka nisur prej disa muajsh dhe gjërat po ecin aq mirë e aq natyrshëm, sa Getinjo nuk i rezistoi dot tundimit për të ndarë pak nga kjo lumturi me publikun gjatë ditës së të dashuruarve. Ky është një veprim që ai e bën vërtet rrallëherë, pasi njihet si një personazh që e ruan me fanatizëm jetën e tij private.
Duket se Era ka arritur të thyejë akullin përfundimisht dhe ne i urojmë çiftit më të ri më të mirat. /Prive By Liberta Spahiu
