Ndryshe nga shumë emra të njohur të showbiz-it që zgjedhin heshtjen, mohojnë çdo ndërhyrje dhe preferojnë të mbajnë të fshehtë çdo vizitë në klinikat estetike, Vivien Thano, ish-banorja e Big Brother VIP Kosova 1, ka zgjedhur një qasje krejt të ndryshme – atë të transparencës.
Në një veprim që mund të cilësohet si i guximshëm për një figurë publike, Vivien ka ndarë me ndjekësit e saj të gjithë procesin e një ndërhyrjeje estetike. Bëhet fjalë për ridimensionimin estetik të veshëve – një procedurë që zakonisht mbahet nën radar, por që Vivi e ka sjellë pa filtra në rrjete sociale.
Edhe pse ajo nuk ka deklaruar drejtpërdrejt se bëhej fjalë për një kompleks personal, fakti që ka vendosur të ndërhyjë, ngre pikëpyetje nëse ky ka qenë një detaj që e ka shqetësuar prej kohësh. Detaj që ndoshta shumëkush nuk e kishte vënë re, por që për të mund të ketë pasur më shumë peshë seç duket.
Procesi, sipas saj, ka shkuar mirë dhe ndonëse është ende herët për rezultate përfundimtare, Vivien shfaqet e qeshur, e relaksuar dhe dukshëm e kënaqur me vendimin e marrë. Në një kohë kur shumica zgjedhin të mbajnë fasadën e “natyralitetit”, Vivi duket se ka thyer rregullat e lojës.
