Gazetari i njohur Blendi Fevziu ka zbuluar vendin ku këngëtarja ikonike shqiptare Parashqevi Simaku ka kaluar një nga periudhat më të errëta të jetës së saj – nën qiell të hapur, në zemër të Nju-Jorkut.
Në rrëfimin e tij, Fevziu tregon se Simaku kishte qëndruar për rreth një vit e gjysmë mbi një copë guri në një hapësirë publike, të cilën ajo e kishte kthyer në strehën e saj – në diell, shi e borë.
Për t’u ushqyer dhe për të bërë dush, ajo kishte përdorur ambientet e një furre përballë, pronarët e së cilës ishin treguar të jashtëzakonshëm dhe gjenerozë ndaj një legjende të muzikës shqiptare, ndonëse në rrethana që askush nuk do donte t’i përjetonte.
Fevziu rrëfen gjithashtu se Parashqevia kishte qëndruar disa vite edhe në një rrugicë tjetër shumë pranë, derisa një intervistë e saj për një media lokale amerikane u bë virale, duke bërë që bashkëatdhetarët ta njohin dhe të ndërhyjnë për ta larguar nga rruga.
Një histori tronditëse që hedh dritë mbi jetën e fshehur të një ylli të dikurshëm, që i këndoi Shqipërisë me pasion, por që vetë, për shumë kohë, mbeti pa zë, pa shtëpi dhe pa përkrahje. /Prive By Liberta Spahiu
