Prindër të pikëlluar kanë bërë publike identitetet e disa prej fëmijëve që humbën jetën gjatë përmbytjeve vdekjeprurëse në Camp Mystic, një kamp veror i krishterë për vajza në Teksas, i cili u godit rëndë nga përmbytjet e papritura që filluan më 4 korrik.
Përmbytjet e shpejta që përfshinë pjesën qendrore të Teksasit kanë shkaktuar deri tani 82 viktima, ndërsa autoritetet paralajmërojnë se numri pritet të rritet, pasi operacionet e kërkim-shpëtimit vazhdojnë.
Një nga ngjarjet më prekëse të tragjedisë ishte goditja e Camp Mystic, një kamp i themeluar në vitin 1926, ku vajza të vogla mësonin pavarësinë, lidhnin miqësi dhe forconin vetëbesimin.
Guvernatori i Teksasit, Greg Abbott, tha se rreth 750 vajza ishin në kamp në momentin kur përmbytjet goditën zonën.
Zyrtarët kanë konfirmuar se 10 vajza dhe një këshilluese janë ende të zhdukura.
Renee Smajstrla (8 vjeç)
Familja e Renee konfirmoi vdekjen e saj në rrjetet sociale. Xhaxhai i saj, Shawn Salta, shkroi:
“Ndërsa nuk ishte rezultati për të cilin u lutëm, jemi mirënjohës që Renee u identifikua shpejt. Ajo ishte me shoqet e saj dhe po kalonte kohën më të bukur të jetës. Ajo do të jetojë përgjithmonë në kujtimin tonë si një engjëll i Camp Mystic.”
Sarah
Familja e Sarës foli për gazetën Kerrville Daily Times, ku gjyshja e saj tha:
“Ajo ishte një rreze drite plot jetë. Do të jetojë përherë në zemrat tona. E duam pafundësisht!”
Eloise Peck dhe Lila Bonner
Familja e saj njoftoi fundjavën që kaloi se Eloise ishte gjetur pa jetë.
“Ajo ishte shoqe me të gjithë. Donte kafshët dhe veçanërisht qentë. Vdiq së bashku me shoqen e dhomës dhe mikeshën e saj më të ngushtë, Lila Bonner. Eloise kishte një familje që e donte jashtëzakonisht shumë.”
Familja e Lila-s konfirmoi vdekjen e saj për NBC News, por kërkoi privatësi:
“Në këtë dhimbje të paimagjinueshme, kërkojmë privatësi. Zemrat tona janë me të gjithë ata që e donin Lila-n.”
Janie Hunt
Nëna e Janie-t, nga Dallas, konfirmoi se vajza e saj kishte humbur jetën gjithashtu.
“Jemi thyer. Kjo është një humbje që nuk përshkruhet me fjalë,” tha ajo.
Gjyshja e saj, Margaret, tregoi se gjashtë kushërira të Janie-t ishin gjithashtu në kamp, por fatmirësisht janë të sigurta.
Kjo tragjedi ka prekur jo vetëm komunitetin lokal në Kerrville, por mbarë Teksasin dhe më gjerë. Ndërsa shumë vajza janë ende të zhdukura, familjet dhe autoritetet nuk heqin dorë nga shpresa. /Prive By Liberta Spahiu
