Një lajm i rëndë ka goditur botën e kinemasë: Malcolm-Jamal Warner, aktori i njohur për rolin ikonik si Theo Huxtable në serialin legjendar The Cosby Show, ka ndërruar jetë në moshën 54-vjeçare.
Sipas raportimeve, Warner ishte me familjen në një pushim në Kosta Rika, ku fatkeqësisht u mbyt gjatë një noti në det. Përfaqësuesit e aktorit nuk kanë dhënë ende një koment zyrtar.
Warner hyri në historinë e televizionit me rolin e tij në “The Cosby Show” (1984–1992), ku luajti djalin e vetëm të personazhit të Bill Cosby-t, Dr. Heathcliff Huxtable. Ai ishte një nga figurat më të dashura të televizionit amerikan gjatë viteve ‘80 dhe ‘90.
Në një intervistë të vitit 2023 për PEOPLE, Warner u shpreh:
“E di që mund të flas në emër të gjithë kastit kur them se The Cosby Show është diçka për të cilën jemi ende shumë krenarë.”
Pavarësisht polemikave që rrethuan më vonë figurën e Cosby-t, Warner theksoi rëndësinë kulturore të serialit:
“Pavarësisht si ndihen disa njerëz sot për atë shfaqje, unë ende jam krenar që isha pjesë e diçkaje kaq ikonike që pati një ndikim të thellë — në radhë të parë tek kultura e zezë, por edhe në kulturën amerikane në tërësi.”
Pas suksesit të madh në “The Cosby Show”, Warner vazhdoi karrierën me role të rëndësishme në seriale si “Malcolm & Eddie” (1996–2000), ku luajti përkrah Eddie Griffin, dhe më pas në “Reed Between the Lines” (2011–2015), përkrah Tracee Ellis Ross.
Ndarja nga jeta e Malcolm-Jamal Warner lë një boshllëk të madh në botën e artit dhe televizionit. Ai do të kujtohet gjithmonë si një ikonë e ekraneve amerikane dhe një zë i dashur për brezat që u rritën me rolet e tij. /Prive By Liberta Spahiu
