Eve Jobs, vajza e gjeniut të teknologjisë Steve Jobs, është martuar me kalorësin e Team GB, Harry Charles, në një ceremoni madhështore në zemër të fshatit piktoresk Great Tew në Cotswolds.
Dasma katër-ditore, që u përshkrua si “dasma e vitit” nga rrethet e larta të shoqërisë britanike, u organizua me një buxhet marramendës prej £6.7 milionë e financuar nga nëna e saj, Laurene Powell Jobs, 61 vjeçe. Ajo siguroi që çdo detaj të ishte i përsosur për martesën e vajzës së saj 27-vjeçare me sportistin 26-vjeçar.
Festimet nisën të mërkurën dhe kulmuan me ceremoninë zyrtare në Kishën St Michael’s and All Angels – një kishë e shekullit të 12-të ku edhe më parë janë mbajtur dasma të famshme, përfshirë atë të regjizorit Sam Mendes.
Të ftuarit, përfshirë emra të njohur si vajza e Bill Gates, Jessica Gates, Sofia Abramovich dhe chef-i me famë botërore Baroness Ruth Rogers, mbërritën me minibusë luksozë. Vajzat e nuses, në mesin e të cilave ishte edhe Jessica Springsteen – vajza e legjendës së muzikës Bruce Springsteen – ishin veshur me fustane të kuq saten, duke mbajtur në duar buqeta me degë fërre.
Nusja u fut në kishë përmes një rruge private, me një vonesë prej gjysmë ore, dhe rreth orës 6:45 pasdite çifti shkëmbeu betimet, teksa kambanat kumbuan për të shënuar nisjen e martesës së tyre.
Megjithatë, banorët vendas u shprehën të zhgënjyer që nuk patën mundësi të shihnin as hyrjen e nuses, as daljen e çiftit të sapomartuar, të cilët u larguan me një furgon luksoz Mercedes drejt festimeve të mbrëmjes.
Pavarësisht luksit, çifti thuhet se ka paguar vetëm tarifën standarde prej £675 për të mbajtur ceremoninë në kishë.
Dhe për të finalizuar natën, vetë Sir Elton John performon në festën e mbrëmjes me një pagesë të raportuar prej £1 milion për një orë këndim.
Çifti u fejua në shtatorin e kaluar dhe filluan lidhjen e tyre në vitin 2022, duke u shfaqur për herë të parë si çift në Lojërat Olimpike në Paris.
Dasma e Eve Jobs dhe Harry Charles do të mbahet mend gjatë si një ndër ngjarjet më të shkëlqyera të botës së famshme dhe aristokracisë moderne. /Prive By Liberta Spahiu
