Dy muaj pasi u shpall kryesisht i pafajshëm në gjyqin e madh penal kundër tij, reperi dhe producenti i njohur amerikan ka marrë një tjetër fitore ligjore.
Një gjykatës në Manhattan hodhi poshtë një padi civile që e akuzonte atë për përdorim të drogës dhe abuzim seksual ndaj një 23-vjeçari në një afterparty në vitin 2015.
Gjykata vendosi se çështja ishte paraqitur shumë vonë dhe kishte kaluar afatin ligjor si sipas ligjit të Nju Jorkut, ashtu edhe atij të Kalifornisë:
“Pasi padia është e vonuar sipas të dy ligjeve, ajo duhet të pushohet për të gjithë të paditurit,” thuhej në vendim.
Avokati i paditësit anonim, Tony Buzbee, deklaroi për Billboard se ky nuk është fundi i çështjes:
“Nuk do ta quaja një fitore për z. Combs. Ne nuk do ta lejojmë atë të shmangë gjykimin për meritat e çështjes vetëm për një teknikalitet,” u shpreh ai, duke paralajmëruar se padia do të rihapet në Kaliforni.
Ky është vendimi i dytë i madh ligjor në favor të Diddy-t pas shpalljes së pafajësisë në gjyqin penal. Vetëm pak ditë më parë, një gjykatës federal hodhi poshtë edhe një padi prej 60 milionë dollarësh të ngritur nga Sara Rivers, ish-konkurrente e “Making the Band 2”, me argumentin se ishte paraqitur shumë vonë.
Megjithatë, Diddy ende përballet me dhjetëra padi të tjera të hapura paralelisht me procesin penal.
Muajin e kaluar ai u shpall i pafajshëm për akuzat e trafikut seksual dhe “RICO”, por u dënua për dy akuza lidhur me prostitucion ndër-shtetëror. Aktualisht ai ndodhet në paraburgim, në pritje të dënimit që do të jepet në tetor, ku rrezikon disa vite burg.
Padia e fundit, e rrëzuar nga gjykata, kishte akuzuar Combs se kishte droguar dhe abuzuar me një artist të ri që po ndiqte karrierën si reper, në një festë pas koncertit në Los Anxhelos. Por gjykatësi theksoi se padia duhej të ishte ngritur brenda 5 viteve, dhe ligji i vitit 2019 që e zgjati afatin në 20 vite nuk mund të zbatohej prapaveprueshëm.
Avokati i paditësit konfirmoi se do të vazhdojnë betejën ligjore në një gjykatë tjetër në Kaliforni, ku dyshohet se ka ndodhur ngjarja. /Prive By Liberta Spahiu
