Një ngjarje tragjike ka tronditur Meksikën.
Influencerja e TikTok, Esmeralda Ferrer Garibay, 32 vjeçe, është gjetur e vrarë së bashku me bashkëshortin e saj Roberto Carlos Gil Licea, 36 vjeç, dhe dy fëmijët e tyre, Gael Santiago, 13 vjeç, dhe Regina, vetëm 7 vjeçe.
Trupat e tyre u gjetën brenda një furgoni tip pick-up në qytetin Guadalajara, Jalisco.
Mjeti i llojit Ford Ranger ngjyrë gri ishte braktisur dhe u gjet të premten e kaluar, ndërsa identiteti i viktimave u konfirmua nga autoritetet vetëm dje.
Familja ishte shpërngulur prej pak muajsh në zonën metropolitane të Guadalajarës për arsye pune.
Roberto merrej me tregtinë e automjeteve dhe me kultivimin e domateve në shtetin Michoacán. Hetuesit dyshojnë se vrasja mund të ketë lidhje me aktivitetin e tij të biznesit.
Esmeralda, e njohur në rrjete sociale me pseudonimin Esmeralda FG (@esmeraldafg222), kishte dhjetëra mijëra ndjekës në TikTok. Ajo publikonte kryesisht përmbajtje mbi stilin e jetesës, udhëtime, si dhe video ku bënte lip-sync me këngë “narkokorrido”, balada që lidhen me botën e drogës. /Prive By Liberta Spahiu
