Një mbindërtim i dyshuar në katin e fundit të objektit në lagjen “Lakrishtë” të Prishtinës, të njohur si “ndërtesa e Shqipërisë”, ka ngritur shqetësim tek banorët. Ata pretendojnë se punimet po kryhen pa asnjë masë sigurie dhe në mënyrë të jashtëligjshme.
“Bile e kam bërë edhe një video ku shihet qartë – hiqeshin skelet pa asnjë lloj sigurie, banorët qarkullonin poshtë. Ka shumë dyshime për vepra penale në këtë rast”, ka thënë për Kallxo.com Jahë Balaj, kryetar i lagjes, i cili tregon se edhe pas raportimit, punimet vazhduan, raporton Kallxo.com
Nga ana tjetër, Drejtori i Inspeksionit në Komunën e Prishtinës, Bekim Brestovci, ka pranuar se është konstatuar një “tentativë për mbindërtim”. Ai ka bërë të ditur se palës i është dhënë një afat shtatëditor për rrënim të objektit, në të kundërtën më 8 shtator do të ndërhyjë vetë Komuna.
Pronare e banesës figuron Xhuliana Nura, e cila ka mohuar se aty po bëhet mbindërtim. “Jo unë s’kam lidhje me këtë gjë. Ajo banesë është t’u u renovu edhe e di që ka problem me tavan (çati) se rrjedhë uji në banesë dhe e kanë ndreqë problemin. S’ka mbindërtim etj”, është shprehur ajo përmes një reagimi me shkrim për Kallxo.com.
Ky nuk është rasti i vetëm i mbindërtimeve të dyshuara në Kryeqytet, një problem i cili prej vitesh kritikohet nga qytetarët dhe për të cilin Komuna e Prishtinës vazhdon të ankohet për mungesë inspektorësh. /Prive By Liberta Spahiu
