Aktori i njohur hollivudian, Orlando Bloom, ka vendosur të ndajë publikisht disa reflektime të sinqerta nga jeta e tij personale, vetëm pak kohë pas konfirmimit të ndarjes nga këngëtarja e njohur Katy Perry.
Çifti, që prej vitesh ishin ndër më të komentuarit në mediat rozë dhe që bashkë ndajnë vajzën e tyre të vogël Daisy Dove, kanë zgjedhur të ndjekin rrugë të ndara.
Pavarësisht kësaj, siç thekson vetë Bloom, ata po e përballojnë këtë periudhë me pjekuri, mirëkuptim dhe mbi të gjitha – dashuri.
Gjatë një interviste të dhënë më 5 shtator për emisionin e mëngjesit Today, me gazetarin Craig Melvin, Bloom foli hapur për ndryshimet që ka përjetuar në jetën personale.
I pranishëm në studio për të promovuar filmin e tij më të ri aksion The Cut, ai nuk ngurroi të shprehej edhe për aspektin emocional të kësaj kohe të vështirë.
Moderatori Melvin përmendi se që nga hera e fundit që Bloom kishte qenë i ftuar në emision, ai kishte kaluar disa “ndryshime personale” të dukshme, duke i lënë hapësirë aktorit të shprehej lirshëm për atë që po kalon.
Orlando, me një buzëqeshje të qetë dhe një ton të reflektuar, u përgjigj:
“Jam shumë mirë, njeri. Jam jashtëzakonisht mirënjohës. Kemi vajzën më të bukur në botë. E di si është kur e jep veten tërësisht për një projekt, siç bëra në këtë film? Kështu ndihem edhe tani – mirënjohës për gjithçka që ka ndodhur.”
Aktori theksoi se, pavarësisht ndarjes, marrëdhënia mes tij dhe Katy Perry mbetet e shëndetshme dhe e bazuar në respekt e dashuri të ndërsjellë – sidomos për hir të vajzës së tyre.
“Dhe ne jemi mirë. Do të jemi mirë. Asgjë veç dashuri.” – përfundoi ai, duke lënë një mesazh të qartë se ndarja nuk ka sjellë urrejtje apo konflikt mes tyre, por është thjesht një kapitull i ri në jetën e secilit.
Orlando Bloom dhe Katy Perry ishin në një lidhje që nisi në vitin 2016, u ndërpre për një kohë të shkurtër, dhe më pas u rikthyen më të bashkuar se kurrë. Ata u fejuan në vitin 2019 dhe sollën në jetë vajzën e tyre në gusht të vitit 2020.
Tashmë, megjithëse nuk janë më bashkë si çift, ata mbeten bashkëprindër të përkushtuar dhe të lidhur përjetësisht nga dashuria për vajzën e tyre. /Prive By Liberta Spahiu
