Simon Leviev, 35 vjeç (i lindur në Bnei Brak me emrin Shimon Yehuda Hayut), i njohur si “Mashtruesi i Tinder-it”, u arrestua të dielën në mëngjes nga autoritetet gjeorgjiane pas uljes në aeroportin e Batumit.
Arsyeja e arrestimit të tij mbetet ende e paqartë, madje edhe për avokatët e tij. “Fola me të këtë mëngjes pas ndalimit, por ende nuk e kuptojmë arsyen,” tha avokati i tij për mediat izraelite. “Ai ka udhëtuar lirisht nëpër botë deri tani.”
Leviev është një mashtrues izraelit, i cili sipas dokumentarit të Netflix që pasqyron skemat e tij, kaloi vite të tëra duke u shtirur si trashëgimtari i pasurisë së diamanteve të familjes Leviev, duke joshur gra përmes aplikacionit për takime, Tinder.
Ai u paraqitej grave me një stil jete luksoz – avionë privatë, hotele luksoze, makina të shtrenjta – për të fituar besimin e tyre, dhe më pas i bindte të transferonin shuma të mëdha parash me pretekste të ndryshme, zakonisht duke pretenduar se ishte në rrezik dhe kishte nevojë për ndihmë të menjëhershme financiare.
Një tjetër padi u ngrit ndaj tij në nëntor, pas një ankese nga njohja e tij e mëparshme, Iren Tranov. Tranov po e padit Levievin për 414,000 shekel (rreth 100,000 euro), duke pretenduar se i kishte dhënë hua mbi 144,000 shekel të cilat ai nuk i ka kthyer kurrë.
Sipas saj, paratë u dhanë në tetor të vitit 2022 dhe në një bisedë të regjistruar po atë ditë, Leviev premtoi se do t’i kthente. Megjithatë, ajo thotë se premtimet e tij ishin të rreme dhe tani ndodhet në një situatë të vështirë financiare për shkak të mashtrimit të tij.
Në mars të vitit 2024, një kallëzim penal u paraqit ndaj tij nga Ephraim dhe Ruthy Leviev Yelizarov – kjo e fundit është vajza e biznesmenit të njohur të diamanteve, Lev Leviev – me pretendimin se Simon dëmtoi reputacionin e familjes duke u paraqitur si vëllai i tyre.
Gjatë një seance gjyqësore, Simon zgjodhi të mos përfaqësohej nga një avokat dhe zhvilloi vetë marrjen në pyetje të dëshmitarëve.
/Prive By Liberta Spahiu
