Në Turqi është duke u diskutuar një nismë e re që ka ngjallur shumë debat publik. Autoritetet po shqyrtojnë idenë që para martesës, çiftet të nënshtrohen një vlerësimi psikologjik të detyrueshëm.
Synimi i këtij procesi është që të ndihmohet në parandalimin e problemeve që shpesh shpërthejnë gjatë martesës, duke nisur nga mungesa e komunikimit e deri tek konfliktet më serioze që shpien në divorc apo dhunë në familje.
Aktualisht, ligji turk parashikon që çdo çift duhet të ketë raport shëndetësor para se të martohet, por ky fokusohet kryesisht tek aspektet mjekësore dhe testet laboratorike. Propozimi i ri do të shtonte edhe dimensionin psikologjik, duke bërë që specialistët të vlerësojnë gjendjen emocionale dhe harmoninë e mundshme mes partnerëve para se të firmoset akti i martesës.
Përkrahësit e kësaj ideje theksojnë se një hap i tillë do të ndihmonte në krijimin e martesave më të shëndetshme dhe të qëndrueshme, duke ulur ndjeshëm statistikat e ndarjeve dhe të traumave familjare.
Por kritikët ngrejnë pyetje mbi të drejtën e privatësisë dhe mbi faktin nëse një test i tillë duhet të jetë i detyrueshëm. Megjithatë, debati është hapur dhe duket se Turqia po e sheh seriozisht mundësinë e aplikimit të vlerësimit psikologjik para-martesor, si një masë parandaluese në shërbim të shoqërisë.
/Prive By Liberta Spahiu
