Tragjedia e rëndë që ndodhi dje, ku në një aksident humbi jetën vëllai i Gjestit, ka lënë pa fjalë të gjithë opinionin publik. Ngjarja solli një valë reagimesh dhe publikimesh në rrjete sociale, por edhe një debat mbi mënyrën se si shprehet dhimbja dhe respekti në kohën e sotme.
Në këtë kontekst, aktorja Sara Kolami ka reaguar me një mesazh të fortë, duke kritikuar “spektaklin publik” që shpesh krijohet pas humbjeve të tilla tragjike.
“Në momente të tilla, familja dhe të afërmit kanë nevojë për qetësi, për ngushëllim të sinqertë, jo për spektakel publik. Njerëzit presin një ‘story’, një postim, sikur respekti dhe dashuria maten me një imazh bardh e zi apo një status të shpërndarë. Harrojmë se dhimbja nuk është për t’u bërë trend, por për t’u përjetuar me dinjitet”, shkroi Sara Kolami.
Ajo theksoi se respekti nuk fshihet pas “like” apo “view”, por gjendet tek një fjalë ngushëllimi, një gjest njerëzor, një mesazh privat për ata që po kalojnë dhimbjen.
“Familja e Gjestit nuk ka nevojë për publikime të pafundme, por për heshtje, qetësi dhe ndihmë të vërtetë. Kujtimi i tij jeton tek ata që e kanë dashur, jo tek postimet që zhduken pas 24 orësh”, u shpreh Kolami.
Mes dhimbjes dhe zhurmës mediatike, mesazhi i Sara Kolamit mbetet një thirrje për reflektim dhe dinjitet. /Prive By Liberta Spahiu
