Sipas informacionit financiar dhe firmës mediatike Bloomberg, Cristiano Ronaldo është bërë futbollisti i parë në histori që arrin statusin e miliarderit.
Bloomberg Billionaires Index, i cili monitoron pasurinë e njerëzve më të pasur në botë bazuar në vlerën neto, ka vlerësuar për herë të parë pasurinë e sulmuesit portugez 40-vjeçar dhe lojtarit të Al-Nassr.
Vlerësimi merr parasysh të ardhurat nga karriera, investimet dhe kontratat e sponsorëve, dhe tregon se pasuria neto e Ronaldos është 1.4 miliard dollarë (1.04 miliard paund).
Sipas të dhënave, ai ka fituar mbi 550 milion dollarë (410 milion paund) vetëm nga paga midis viteve 2002 dhe 2023, duke përfshirë të ardhurat nga marrëveshjet e sponsorëve, përfshirë një kontratë dhjetëvjeçare me Nike me vlerë rreth 18 milion dollarë (13.4 milion paund) në vit.
Kur Ronaldo iu bashkua Al-Nassr në Saudi Pro League në vitin 2022, thuhet se u bë lojtari më i paguar në historinë e futbollit, me një pagë vjetore prej 177 milion paund.
Kontrata e tij duhej të përfundonte në qershor 2025, por ai nënshkroi një marrëveshje të re dyvjeçare – e cila raportohet se kap vlerën mbi 400 milion dollarë (298 milion paund) – që do ta mbajë atë në klub edhe pas ditëlindjes së 42-të.
Sulmuesi argjentinas i Inter Miami, Lionel Messi, i cili ka luajtur kundër Ronaldos për shumë vite gjatë kohës së tyre në Spanjë, ka fituar më shumë se 600 milion dollarë (447 milion paund) paga para tatimit gjatë karrierës së tij, sipas Bloomberg.
Kjo përfshin 20 milion dollarë (15 milion paund) pagesë të garantuar vjetore që nga viti 2023, e cila është rreth 10% e të ardhurave të Ronaldos në të njëjtën periudhë.
Kur të tërhiqet nga futbolli, Messi 38-vjeçar pritet të marrë një pjesë të aksioneve në Inter Miami. /Prive By Liberta Spahiu
