Me dhimbje të madhe është bërë i ditur lajmi i ndarjes nga jeta të Paqësor Hajdinit, në moshën 74-vjeçare.
Ai ishte babai i personazhit të njohur të rrjeteve sociale, Genard Hajdini. Lajmi u bë publik më 10 tetor dhe ka prekur thellë familjen, të afërmit dhe miqtë e tij.
Humbja e tij vjen vetëm dy muaj pas një ngjarjeje të rëndë që tronditi opinionin publik.
Më 3 gusht 2025, në orët e para të mëngjesit, në një lokal në rrugën “Bardhyl” në Tiranë, Paqësor Hajdini dhe i biri, Genardi, u dhunuan fizikisht nga 40-vjeçari Sh.G.
Të dy përfunduan në Spitalin e Traumës, ku morën ndihmë mjekësore.
Në një video të publikuar më vonë nga ambientet e spitalit, Genardi shfaqej i tronditur dhe tregonte për përjetimin e dhunës, duke thënë:
“Na rrafi njëri, na bëri peshk fare.”
Paqësor Hajdini do të kujtohet si një njeri i qetë, i dashur dhe një mbështetje e palëkundur për djalin e tij, i cili shpesh e përfshinte në videot që ndante me ndjekësit në rrjetet sociale.
Përmes tyre, ai u bë një figurë e njohur dhe e dashur edhe për publikun më të gjerë.
Ngushëllime të sinqerta familjes Hajdini për këtë humbje të madhe.
/Prive By Liberta Spahiu
