Një turiste që kishte marrë një artefakt antik grek rreth 50 vite më parë, e ka rikthyer atë në vendin e origjinës.
Gruaja e paidentifikuar e kishte marrë artefaktin 2,400-vjeçar gjatë një vizite në Leonidaion – një han i shekullit IV para Krishtit në Olimpinë e Lashtë, vendlindja e Lojërave Olimpike.
Pas dekadash në pronësi të saj, ajo vendosi ta dorëzojë vullnetarisht te Universiteti i Münsterit në Gjermani, i cili organizoi kthimin e tij. Artefakti, i njohur si kapiteli i kolonës jonike, është prej guri gëlqeror, 23 cm i lartë dhe 33 cm i gjerë.
Zyrtarët grekë e morën në dorëzim javën e kaluar dhe e prezantuan në një ceremoni në Qendrën e Konferencave të Olimpisë së Lashtë, të premten më 10 tetor.
Në deklaratë zyrtare u tha:
“Riatdhesimi u bë i mundur falë ndjeshmërisë dhe guximit të një gruaje gjermane, që e kishte marrë gjatë një vizite në Leonidaion. E frymëzuar nga kthimet e fundit të objekteve të rëndësishme nga Universiteti i Münsterit, ajo vendosi ta dorëzojë atje, dhe me ndihmën e universitetit, u kthye në Greqi.”
Zyrtarët folën edhe për rëndësinë e Leonidaionit, duke theksuar se:
“Leonidaioni, i quajtur sipas donatorit Leonidas nga Naksosi, ndodhet jashtë Altisit, në pjesën jugperëndimore të shenjtërores së Olimpisë. Është ndërtesa më e madhe në këtë kompleks, me harkada jonike në të katër anët. U ndërtua në gjysmën e dytë të shekullit IV p.K. dhe shërbente për akomodimin e vizitorëve të shquar.”
Gruaja tha se kthimi i këtij objekti ishte i frymëzuar nga aktet e fundit të universitetit gjerman për të rikthyer objekte të grabitura, duke bërë kështu gjënë e duhur.
Sekretari i Përgjithshëm i Kulturës, Georgios Didaskalos, ka theksuar më parë rëndësinë e këtyre kthimeve.
Gjatë një eventi ku një kokë mermeri nga periudha romake në Selanik u rikthye, ai u shpreh:
“Ky është një moment prekës. Kultura dhe historia nuk njohin kufij, por kërkojnë bashkëpunim, përgjegjësi dhe respekt të ndërsjellë. Çdo kthim është një akt drejtësie dhe një urë miqësie mes popujve.”
/Prive By Liberta Spahiu
