Aktori i njohur Jeton Zogjani ka reaguar pas pjesëmarrjes së tij në protestën e organizuar në Hagë, ku qindra qytetarë nga Kosova, përfshirë edhe motoristë, ngritën zërin kundër padrejtësive që po u bëhen ish-krerëve të UÇK-së nga Gjykata Speciale.
Në një reagim të ndarë në rrjete sociale, Zogjani theksoi se kjo protestë kishte një ndjesi të veçantë, pasi ishte organizuar nga qytetarë të zakonshëm që kishin ardhur me përkushtim nga Kosova. Ai nënvizoi se në kauza të tilla duhet të përfshihen më shumë fytyra publike, sepse, siç shkroi ai, “po jetojmë të lirë të gjithë, falë luftës së shumë burrave dhe grave që sot i kemi edhe dëshmorë.”
Zogjani u shpreh se kjo nuk është një protestë për individë të caktuar, por për vetë luftën e shenjtë të Ushtrisë Çlirimtare të Kosovës, e cila po gjykohet padrejtësisht. “Protesta kundër padrejtësive të Hagës nuk është protestë për emra të përveçëm. Këtu po gjykohet lufta e shenjtë e UÇK-së,” shkroi ai.
Në fund të reagimit, aktori bëri thirrje të fuqishme ndaj opinionit publik dhe sidomos figurave publike që të mos heshtin: “Ngriteni zërin ndaj kësaj padrejtësie, derisa të lirohen krerët e UÇK-së.”
/Prive By Liberta Spahiu
