Një moment i veçantë për artin shqiptar në skenën ndërkombëtare ka ndodhur në Londër. Artisti nga Kosova, Jakup Ferri, është takuar me Madhërinë e Tij, Mbretin Charles III, në një pritje të organizuar në St James’s Palace, një nga rezidencat mbretërore më të njohura të Londrës.
Në këtë event, i zhvilluar në kuadër të Samitit të Liderëve të Ballkanit Perëndimor, Mbretëria e Bashkuar priti figura krijuese dhe bashkëpunëtorë nga i gjithë rajoni, ku Ferri u përzgjodh për të ekspozuar veprat e tij artistike përkrah përfaqësuesve të tjerë ndërkombëtarë.
Në postimin e tij në Instagram, Ferri shkruan se ishte “nder i madh të takonte Mbretin Charles III dhe të ekspozonte punën e tij në St James’s Palace”, duke i shprehur mirënjohje British Council për ftesën në këtë ngjarje të jashtëzakonshme.
Jakup Ferri, i lindur në Prishtinë në vitin 1981, është një nga artistët më të vlerësuar bashkëkohorë nga Kosova. Ai njihet për stilin e tij të veçantë figurativ, ku ndërthur elemente të artit popullor me vizatime naive e ngjyra të gjalla. Punimet e tij përfshijnë piktura, vizatime dhe tapiceri të endura, të cilat janë prezantuar në ekspozita të rëndësishme si Bienalja e Venecias 2022, Kunstmuseum Luzern në Zvicër dhe EMΣT – National Museum of Contemporary Art në Athinë.
Pjesëmarrja e Ferrit në këtë ngjarje me Mbretin Charles III përbën një tjetër sukses për artin kosovar, duke e vendosur emrin e tij në mesin e krijuesve më të respektuar të rajonit në arenën ndërkombëtare.
/Prive By Liberta Spahiu
