Edhe pse termi graysexual (apo “gri-seksual”) ekziston prej disa vitesh, shumë njerëz ende nuk e dinë saktësisht se çfarë nënkupton.
Kohët e fundit, në internet është folur shumë edhe për një term tjetër – finsexual, që sipas një përdoruesi të Reddit-it, përshkruan “tërheqjen ekskluzive ndaj atyre që kanë natyrë femërore”.
Kjo do të thotë se një person finsexual mund të tërhiqet nga gratë, personat joditarë me energji femërore, apo edhe burra që shfaqin feminilitet – pra, është tërheqje ndaj vetë feminitetit.
Por çfarë është graysexual?
Sipas Healthline, ky term qëndron diku mes asexual dhe allosexual, pra mes personave që nuk ndiejnë aspak tërheqje seksuale dhe atyre që e përjetojnë rregullisht. Siç e shpjegon faqja LGBTQIA+ Wiki, graysexual është një identitet brenda spektrit aseksual, që përfshin njerëz që:
përjetojnë tërheqje seksuale shumë rrallë,
me intensitet të ulët,
ose në mënyrë të paqartë.
Pra, mund të thuhet se është një “zonë gri” mes mungesës së plotë të dëshirës seksuale dhe përjetimit të saj të zakonshëm.
Personat aseksualë mund të kenë ndjenja romantike dhe lidhje të ngushta emocionale, por zakonisht nuk kërkojnë marrëdhënie seksuale. Ndërsa termi allosexual i referohet personave që ndiejnë tërheqje seksuale – pra, është e kundërta e aseksualitetit.
Si shfaqet në praktikë graysexualiteti?
Nuk ka rregulla të përcaktuara, por sipas Healthline, personat që identifikohen si graysexual shpesh:
nuk e vendosin tërheqjen seksuale si prioritet në zgjedhjen e partnerit,
ndiejnë tërheqje seksuale vetëm herë pas here,
e përjetojnë atë vetëm në rrethana të caktuara,
ose shprehin dashurinë e afërsinë në mënyra të tjera – për shembull përmes përqafimeve, bisedave të ngrohta apo kujdesit ndaj partnerit.
Specialisti i seksualitetit dhe gjinisë, Mark Cusack, i cili flet shpesh për këtë temë në kanalin e tij në YouTube “notdefining”, ka treguar përvojën e tij personale si graysexual:
“Të kesh fjalët e duhura për të përshkruar këto ndjesi është shumë e rëndësishme, sepse të ndihmon të komunikosh më qartë kush je dhe çfarë ke nevojë.
Fjala gray ace më ka ndihmuar shumë, sepse u tregon njerëzve se, po, unë përjetoj tërheqje seksuale. Kam marrëdhënie intime, më pëlqejnë gjërat seksuale dhe fantazitë, por ndoshta i përjetoj në një nivel shumë më të ulët sesa shumica e njerëzve.”
Në thelb, graysexual nënkupton një mënyrë ndryshe, më të butë dhe më të rrallë të përjetimit të tërheqjes seksuale, një kujtesë se seksualiteti nuk është i njëjtë për të gjithë, por ekziston në shumë nuanca mes të bardhës dhe të zezës. /Prive By Liberta Spahiu
