Skena e Festivalit të Këngës në Radiotelevizionin e Kosovës (RTK) ka njohur fituesen e saj të re. Këngëtarja e talentuar nga Tirana, Arsi Bako, është shpallur triumfuesja e madhe e edicionit të tretë të këtij eventi prestigjioz, që u mbajt mbrëmë në Prishtinë.
Me një performancë të fuqishme dhe plot emocion, Arsi Bako fitoi zemrat e jurisë dhe publikut me këngën e saj “Rreze zjarr”. Kënga, një krijim energjik me frymë roku, e bëri atë të dallohej mes 10 finalistëve, duke i siguruar çmimin kryesor, trofeun “Diamanti i Kaltër”.
Kush është Arsi Bako?
Për publikun e gjerë në Kosovë, emri i Arsi Bakos mund të jetë i ri, por ajo ka një karrierë disavjeçare në skenën muzikore në Shqipëri.
Me origjinë nga Tirana, Arsi e ka filluar karrierën e saj muzikore që në moshën 15-vjeçare. Suksesi i saj i parë i rëndësishëm erdhi në festivalin e gjimnazeve “Art Fest”, ku spikati menjëherë duke fituar çmimin “Zëri më i mirë” në daljen e saj të parë, dhe duke rrëmbyer “Çmimin e Parë” një vit më vonë.
Ajo njihet si një kantautore e kompletuar, e cila shkruan tekste dhe kompozon vetë shumë prej këngëve të saj. Përveç muzikës, Arsi luan piano, kitarë dhe praktikon pikturën.
Para fitores në RTK, Bako ka qenë pjesëmarrëse në disa prej festivaleve më të mëdha në Shqipëri, përfshirë “Festivalin e Këngës në RTSH” (në dhjetor 2023 me këngën “Zgjohu”) dhe “Kënga Magjike” (në 2022 me “Më Mbaj” dhe në 2024 me “Dua… Dua… Dua…”).
E emocionuar pas marrjes së çmimit kryesor në RTK, Bako u shpreh shkurtimisht për mediat: “Nuk e kam pritur. Ndihem shumë e lumtur. Shumë faleminderit!”.
Nata finale ishte një garë e fortë, ku nuk munguan vlerësimet edhe për artistët e tjerë. Në vendin e dytë u rendit Florent Abrashi me këngën “Unë dhe Ti”, ndërsa vendi i tretë i takoi Arjeta Palushaj me baladën “Andrra”.
Përveç çmimit të madh, Arsi Bako u vlerësua gjithashtu edhe me Çmimin e Kryeqytetit.
Mbrëmja finale e edicionit të tretë të Festivalit të Këngës në RTK u pasurua edhe me performancat e yjeve të ftuar si Gjon’s Tears, Elvana Gjata, Dren Abazi dhe Tuna, duke e kthyer atë në një spektakël të vërtetë të muzikës shqiptare.
