Ylli botëror nga Brazili, Anitta, ka ndarë orët e fundit disa momente nga puna e saj në studio përmes Instagramit. Por, ajo që duhej të ishte thjesht një “ngacmim” për projektin e radhës, për publikun shqiptar ka tingëlluar tejet e njohur.
Në fakt, versioni që Anitta po punon është pothuajse “copy-paste” i hitit të reperes Tayna, “Si Ai”, por i sjellë në gjuhën portugeze.
Ngjashmëria është e frikshme, sidomos në vijën melodike të refrenit, i cili është thuajse identik me atë të artistes nga Kosova. Sipas informacioneve, duket se kemi të bëjmë me një përvetësim të paautorizuar. Thuhet se Anitta (apo ekipi i saj) nuk i ka blerë të drejtat autoriale për ta ripërpunuar këngën, çka e bën këtë situatë të duket si një vjedhje e pastër artistike dhe jo një “remake” ligjor.
Kujtojmë se “Si Ai” mban vulën e një prej sukseseve më të mëdha në karrierën e Taynës. Projekti u shndërrua në himn absolut, duke thyer rekorde klikimesh dhe duke u bërë viral gjithandej, një tregues i qartë i potencialit që kjo këngë kishte edhe për tregun ndërkombëtar – potencial që me sa duket, Anitta po tenton ta shfrytëzojë pa leje.
Mbetet të shihet nëse do të ketë një reagim ligjor nga menaxhmenti i Taynës për këtë “huazim” të papritur nga Brazili. /Prive By Liberta Spahiu
