As në ëndrrat më të këqija, një javë pas lajmit që e dhamë ekskluzivisht për futjen e tij në Big Brother VIP Albania 5, si redaksi, nuk do e çonim nëpër mend se do merrnim rrugën për në Tetovë për këtë arsye. Sot, Shpati u përcoll për në banesën e fundit.
Një artist ikonë, jeta e të cilit u ndërpre papritur nga një sulm në zemër në Itali, atje ku ishte nisur shpresëplotë për trajtimin e djalit të tij të vetëm, Roelit.
Në një koinçidencë të dhimbshme, ai erdhi në jetë një të dielë maji të vitit 1985. Po në të dielë, kësaj radhe nëntori, artisti i madh u përcoll për në amshim.
Gjatë ceremonisë, Big Mama nuk i mbante lotët, teksa mes dhimbjes merrej me organizimin e çdo detaji. Jo shumë kohë pas, rreth orës 10:30, aty mbërriti edhe nëna Gjylymsere. Përkundër dhimbjes që i djeg shpirtin, ajo u mbajt gur e fortë!
Trupi i Shpatit u dërgua për herë të fundit edhe në skenën ku nisi gjithçka si i vogël, në një rrugëtim plot ëndrra e që i solli suksese të mëdha në diskografinë shqiptare.
Por, mes gjithë dhimbjes dhe lotëve që pushtuan Tetovën sot, një detaj rrëqethës mbart një simbolikë të rëndë që pak kush e vuri re.
25 vite më parë, Shpati i kishte dhënë lamtumirën babait të tij, kur ishte vetëm 15 vjeç – një humbje që e shënjoi jetën e tij. Jeta e deshi që çerek shekulli më pas, në një bashkim tragjik, trupi i tij të prehet vetëm dy hapa larg të atit.
Babë e bir, tashmë të bashkuar në përjetësi, pranë njëri-tjetrit.
Prive By Liberta Spahiu ju sjell reportazhin e plotë nga akademia përkujtimore dhe pamjet prekëse të lamtumirës pranë babait të tij në videon e mëposhtme.
