Një akademi përkujtimore është mbajtur ditën e sotme në Komunën e Çairit, në nderim të jetës dhe veprës së artistit të mirënjohur, Shpat Kasapi.
Të pranishëm në këtë organizim ishin familjarë, miq dhe kolegë të shumtë, të cilët mes dhimbjes nderuan figurën e këngëtarit. Fjalimet i hapën figurat e njohura si Tuna Sejdi dhe Leonora Poloska, por momentet më prekëse erdhën nga familjarët e tij më të afërt.
E para që mori vëmendjen e të gjithë të pranishmëve ishte nëna e Shpatit. Mes lotësh dhe dhimbjes së papërshkrueshme, ajo u shpreh se pavarësisht përvojës së saj jetësore në arsim, dhimbja për djalin ia kishte marrë zërin.
“Kam ligjëruar 22 vite si profesoreshë, por sot nuk kam fjalë…” – u shpreh ajo, duke lënë të kuptohet se asnjë fjalë nuk mund ta përshkruajë humbjen e djalit.
Pas saj, fjalën e mori bashkëshortja e tij, Selvije Jao. Ajo e cilësoi Shpatin si njeriun që e kompletoi dhe e deshi pa kushte, ndërsa foli me emocion për djalin e tyre, Roelin.
“Një njeri që mua si Selvije më ka kompletuar, më ka mbështetur, më ka respektuar dhe më ka dashur. Mbi të gjitha, më ka falë një djalë si drita. Roeli është vetëm 3 vjet e gjysmë dhe ai ende nuk e kupton se nuk e ka babain e tij. Unë nuk e di si do të rritet me këtë dhe nuk e di kush do t’i tregojë, por e di që ai do të jetë shumë krenar me babain e tij,” tha Selvija.
Kujtojmë se Shpat Kasapi u nda nga jeta papritur, duke lënë pas një dhimbje të madhe tek artdashësit dhe familja. I ndjeri u varros të dielën që lamë pas, në qytetin e tij të lindjes, në Tetovë. /Prive By Liberta Spahiu
