Cristiano Ronaldo ka prezantuar lëvizjen e tij më të fundit jashtë fushës së blertë, dhe këtë herë nuk bëhet fjalë për futboll, por për një sipërmarrje që synon elitën botërore.
Ylli portugez ka hapur “Vega Private Members Club”, një klub ultra-ekskluziv ku rregulli i parë dhe i vetëm është privatësia absolute.
Në një kohë kur çdo moment i jetës sonë dokumentohet në rrjetet sociale, Ronaldo ka vendosur të shkojë kundër rrymës.
Në ambientet e klubit të tij të ri, përdorimi i telefonave dhe filmimet janë rreptësisht të ndaluara. Ky projekt është projektuar si një oaz për ata që duan t’i shpëtojnë syrit të publikut dhe kamerave të paparacëve.
Struktura e klubit është menduar të jetë multifunksionale. Gjatë orëve të ditës, ai shërben si një qendër e qetë biznesi, e pajisur me zyra private dhe salla mbledhjesh për takime të nivelit të lartë.
Megjithatë, sapo bie mbrëmja, hapësira transformohet plotësisht, duke u kthyer në një restorant luksoz dhe bar prestigjioz, i aksesueshëm vetëm për një rreth shumë të ngushtë njerëzish.
Për të qenë pjesë e këtij klubi, dëshira nuk mjafton. Ekskluziviteti ka një çmim të lartë: anëtarësimi i përjetshëm kushton 20,000 dollarë, një pagesë që bëhet vetëm një herë për të siguruar privilegjet speciale.
Por edhe nëse i keni paratë, konkurrenca është e fortë, pasi është njoftuar se vetëm 600 persona në mbarë botën do të kenë fatin të bëhen anëtarë.
Mesazhi i Ronaldos me këtë investim është i qartë: në botën moderne, luksi i vërtetë nuk janë makinat apo bizhuteritë, por mundësia për të jetuar momente pa pasur frikën se ato do të përfundojnë në internet.
Pa foto, pa video dhe pa rrjete sociale – “Vega” premton të jetë vendi ku elita mund të jetë vetvetja, larg vëmendjes së globit.
/Prive By Liberta Spahiu
