Bota e showbiz-it turk është përfshirë nga një valë e gjerë polemikash pas një sërë operacionesh të njëpasnjëshme kundër drogës.
Mediat lokale raportojnë se Departamenti i Policisë së Stambollit, në koordinim me Zyrën e Prokurorit Publik, ka ndërmarrë bastisje në disa lokacione kyçe, duke nxjerrë në dritë emra shumë të njohur të ekranit dhe muzikës.
Gjatë këtyre aksioneve, forcat e rendit kanë shoqëruar për marrje në pyetje disa figura prominente, pasi në disa prej adresave të kontrolluara u gjetën substanca që dyshohen të jenë narkotike. Procedurat ligjore janë aktualisht në vijim,ndërsa vëmendja e publikut është përqendruar te detajet e reja që po dalin nga hetimet intensive.
Sipas raportimeve të fundit, policia ka ndaluar këngëtaren e njohur Aleyna Tilki, fenomenin e rrjeteve sociale Danla Bilic dhe aktoren İrem Sak. Gjithashtu, bëhet me dije se autoritetet kanë lëshuar urdhër-arreste zyrtare edhe për aktoren dhe modelen Melisa Döngel, si dhe për këngëtarin Yusuf Güney, të cilët pritet të përballen me drejtësinë.
Kjo valë arrestimesh pason një aksion të mëparshëm ku u përfshinë yje të tjerë të kinematografisë turke. Shumë prej tyre iu nënshtruan kontrolleve në banesa dhe testeve të gjakut për të vërtetuar përdorimin e lëndëve të ndaluara.
Ndërkohë që disa personazhe janë liruar pas deklaratave të tyre, të tjerë mbeten ende nën hetim të plotë deri në zbardhjen e plotë të ngjarjes. /Prive By Liberta Spahiu
