Ndërsa rrjetet sociale janë mbushur me postime festive dhe premtime për vitin 2026, Blerta ka zgjedhur të ndajë një anë tjetër, më të vështirë dhe më reale të jetës së saj.
Përmes një postimi emocional në Instagram, ajo ka treguar se për të, ndërrimi i viteve nuk shoqërohet me festime, por me reflektimin mbi një periudhë tejet të rëndë sfidash shëndetësore dhe emocionale.
Viti i qëndresës dhe dhimbjes
Ashtu siç edhe ka ndarë më herët në postime të ndryshme, Blerta ka rrëfyer se viti që lamë pas nuk kishte momente kulmi apo udhëtime të bukura, por ishte i mbushur me spitale, operacione dhe ankth. Ajo shpjegon se mungesa e fotove të bukura vjen sepse ditët e saj ishin një luftë e vazhdueshme për mbijetesë. “Nuk po e detyroj veten të gjej ditë apo foto të mira, sepse e vërteta është që ato nuk ekzistonin,” shkruan ajo, duke theksuar se periudha e fundit ishte thjesht një përpjekje për të “shtyrë” ditët e rënda që askush nuk i pa.
Mesazhi për vitin 2026
Ndryshe nga optimizmi i zakonshëm i fillimvitit, Blerta u shpreh skeptike ndaj thënieve klishe se ky do të jetë “viti i saj”. Për të, viti 2026 mbetet thjesht një numër në kalendar, duke pasur parasysh se ka vite që nuk ka pasur mundësinë të shijojë kujtime të bukura. Megjithatë, ajo gjen forcë te shenjat që i kanë mbetur, duke thënë: “Kam vraga që thonë: unë jam ende këtu. Dhe ndonjëherë kjo është e gjitha që mund të bësh në një vit.”
Shëndeti mbi të gjitha
Në mbyllje të mesazhit të saj, Blerta falënderoi ndjekësit për mbështetjen e pakursyer dhe bëri një urim të thjeshtë por domethënës për të gjithë: shëndetin. Sipas saj, pa shëndet çdo gjë tjetër e humbet kuptimin, duke e vënë këtë element si prioritetin e vetëm dhe më të rëndësishëm për vitin që sapo ka nisur. /Prive By Liberta Spahiu
