Reperi i njohur A$AP Rocky ka zbuluar së fundmi se nëna e tij, Renee Black, kishte dëshiruar që ai të ishte me Rihanna-n shumë kohë përpara se ata të nisnin romancën e tyre. Gjatë një interviste në podcast-in “Popcast” të The New York Times, të publikuar këtë të enjte, Rocky tregoi se e ëma e “shiptonte” (mbështeste si çift) dyshen që kur ata ishin thjesht miq.
Sipas reperit, Renee Black kishte një simpati të veçantë për Rihannan, duke e konsideruar atë si një person shumë “origjinal” dhe të vërtetë. Rocky kujtoi bisedat me të ëmën, e cila i thoshte hapur se preferonte Rihanna-n mbi vajzat e tjera me të cilat ai shoqërohej në atë kohë.
“Nënat dinë më mirë”
Rocky tregoi me të qeshur se si nëna e tij i thoshte: “Unë e di që të pëlqen kjo vajza me të cilën je tani… nuk po përmend emra, por unë të dua me RiRi-n.” Reperi rrëfeu se në atë kohë i përgjigjej: “Ma, pse vazhdon e thua këtë? Ajo vajzë as nuk më dëshiron në atë mënyrë.” Megjithatë, duke parë marrëdhënien e tyre sot, ai pranoi: “Nënat dinë më mirë.”
Koha e duhur për dashurinë
Gjatë bisedës, artisti u shpreh mirënjohës që Rihanna u bë pjesë e jetës së tij në momentin e duhur. Ai pranoi se nëse do të ishin lidhur më herët, asnjëri prej tyre nuk do të kishte qenë gati për një angazhim aq serioz sa ky që kanë sot. Ky pjekuri në kohë duket se ka qenë çelësi i suksesit të çiftit, të cilët tashmë kanë edhe dy fëmijë së bashku.
Lidhja e fortë dhe rrënjët e përbashkëta
A$AP Rocky e cilësoi Rihanna-n si “shpirtin e tij binjak”, duke vënë në dukje se ata janë në të njëjtën valë për shumë arsye: kanë lindur në të njëjtin vit dhe kanë lidhje të forta me Barbadosin. “Babai im është nga vendi i saj. Kur kthehem atje, kam mundësinë të shoh të dyja anët e familjes sime,” u shpreh ai, duke theksuar se kjo trashëgimi e përbashkët e ka bërë lidhjen e tyre edhe më të veçantë. /Prive By Liberta Spahiu
