Nëse dikush priste që liria e Ervin Salianjit të sillte rikthimin e çiftit të shumëpërfolur në qendër të vëmendjes, mbrëmja e sotme provoi të kundërtën.
Në episodin e ri të podcastit të saj me Bora Zemanin, Grida Duma foli me kode, por mesazhi ishte i qartë kristal për këdo që ka ndjekur kronikën rozë të javëve të fundit. E fokusuar tek “çlirimi emocional” dhe bilancet e jetës, moderatorja lëshoi fraza që tingëllojnë si një konfirmim i fundit të raportit të saj, pikërisht tani kur pritej e kundërta.
“Për herë të parë nuk kam pasur asnjë siklet të lëshoj… jo çdo gjë që mbahet është vlerë,” u shpreh Duma, një deklaratë që bie rëndë duke marrë parasysh rrethanat.
Edhe pse Salianji ka kohë që ka lënë qelinë dhe i është rikthyer jetës normale, duket se kjo nuk ka shërbyer për të forcuar lidhjen, por për të kristalizuar ndarjen. Ishte Prive By Liberta Spahiu që javë më parë zbuloi detajin që nuk i shpëtoi askujt: Grida e hoqi Salianjin nga lista e ndjekësve në Instagram. Ky “unfollow” nuk ishte një veprim impulsiv adoleshentësh, por një sinjal i ftohtë distancimi publik.
Sonte, fjalët e saj duken si shpjegimi logjik i atij veprimi digjital. Kur Grida thotë se “vjen një pikë ku nuk investon më përtej vetes”, ajo lë të kuptohet se periudha e pritjes apo sakrificës ka mbaruar.
Në vend që dalja e tij nga burgu të shënonte një kapitull të ri bashkimi, duket se ka shërbyer si momenti i së vërtetës për t’i dhënë fund. Për Gridën, siç thotë edhe vetë, “jo çdo lëshim është humbje”, duke nënshkruar kështu publikisht atë që duket si epilogu i një prej romancave më të komentuara në Tiranë /Prive By Liberta Spahiu
