Hyrja e mbrëmshme e DJ Gimbo në shtëpinë e Big Brother VIP Albania ka trazuar ujërat dhe ka ndezur menjëherë motorët e rrjetit. Si krahu i djathtë i Gjestit – fituesit që ende mban kurorën e këtij formati – pritshmëritë për të janë të larta, por duket se e shkuara e afërt e ka “tradhëtuar” banorin më të ri. Ndonëse 24 orët e para të tij në shtëpi kanë kaluar pa incidente dhe me një qetësi relative, ndjekësit besnikë kanë bërë atë që dinë të bëjnë më mirë: gërmimin në arkiva.
Viral po bëhet me shpejtësi një moment nga intervista e tij me Shpend Lipën, e realizuar fiks më 11 Nëntor 2025. Në atë kohë, kur zërat për një pjesëmarrje të mundshme ishin thjesht thashetheme, Gimbo shfaqej kategorik dhe skeptik. Ai jo vetëm që e refuzonte idenë, por jepte argumente pse ai dhe shtëpia më e famshme nuk ishin një kombinim i duhur, duke e cilësuar veten si shumë gjaknxehtë për atë format.
“Shpend nuk bëhet ajo punë. Nuk është fer me fitu dy herë,” shprehej ai me bindje, duke lënë të kuptohet se fitorja e Gjestit ishte e mjaftueshme për ekipin e tyre.
Por deklarata bëhet edhe më interesante kur ai krahason karakterin e tij me atë të fituesit. “Nuk bëhet sepse unë jam një natyrë pak më ndryshe. Gjesti është pak më i qetë se unë. Unë jam me temperament. Është shumë nice, emision i mirë por jo për mu. Jo për mu, nuk është,” ishte shprehur Gimbo.
Epo, duket se dy muaj janë kohë e mjaftueshme për të ndërruar mendje. Mbetet për t’u parë nëse ai “temperamenti” për të cilin fliste do të jetë karta e tij e fortë apo pika e dobët tani që lojën e ka nisur vetë. /Prive By Liberta Spahiu
@lajmetlokaleofficial Shpend nuk bohet ajo punë! #lajmetlokale #bigbrothervipalbania #djgimbo #gjesti #viralshqip ♬ original sound – lajmetlokaleofficial
