Rikthimi i Gjestit në muzikë nuk mund të ishte më i fuqishëm se kaq.
Pas një periudhe tejet të vështirë personale, të shënjuar nga humbja e dhimbshme e vëllait, artisti ka gjetur forcën për t’u ringritur përmes artit. Projekti i tij i ri “Memories” nuk është thjesht një këngë e radhës, por një dedikim rrëqethës që ka prekur thellë zemrat e mijëra shqiptarëve kudo në botë.
Reagimi i publikut ka qenë një “përqafim” masiv virtual për artistin në këto momente delikate.
Kjo mbështetje e pakursyer është përkthyer në një sukses të jashtëzakonshëm në platformat digjitale, ku kënga po dominon listat “Trending” në mbarë Europën. Siç ka treguar vetë Gjesti përmes një postimi, balada mban vendin e parë absolut në Shqipëri, Zvicër dhe Maqedoninë e Veriut, ndërsa renditet ndër më të dëgjuarat në shtete si Gjermania, Suedia, Belgjika e deri në Mbretërinë e Bashkuar. Nuk bëhet fjalë vetëm për klikime, por për një solidarizim të paparë të fansave që kanë ndjerë dhimbjen e tij përmes notave muzikore.
I emocionuar nga kjo valë dashurie dhe nga fakti që kujtimi i vëllait po nderohet në kaq shumë shtete, Gjesti ka reaguar me përulësi. “Me pa kangën trending në kaq shumë shtete dhe gjithë këtë dashni prej juve… s’kom fjalë,” shkruan ai, duke lënë të kuptohet se kjo mbështetje i jep forcë.
Ky rikthim triumfues dëshmon se përtej muzikës, lidhja e Gjestit me publikun është shpirtërore dhe më e fortë se kurrë më parë. /Prive By Liberta Spahiu
