E premtja mbrëma në Big Brother VIP Kosova nuk zhgënjen asnjëherë dhe sonte pritet një spektakël i vërtetë, i mbushur me dinamika që do të mbajnë mbërthyer publikun.
Tashmë është zyrtare! Karrigia e opinionistit sonte do të ketë sërish “zotin” e saj dhe ai është Valdrin Sahiti.
Dizajneri i njohur, i cili ka trazuar ujërat dhe ka dhuruar dinamika të forta në dy paraqitjet e tij të mëparshme këtë sezon, sapo ka konfirmuar rrugëtimin drejt studios së “Big Brother VIP Kosova” përmes një postimi që nuk lë vend për dyshime. Drejtpërdrejt nga dritarja e avionit, Sahiti ka thyer heshtjen duke njoftuar ndjekësit me stilin e tij karakteristik e të drejtpërdrejtë: “Nëse fluturimi shkon mirë – shihemi sonte për një megaspektakël… nëse nuk shkon mirë i bjen mos mu pa po mos vet”.
Ky rikthim i befasishëm i Sahitit vjen në një moment kritik të lojës, duke premtuar se mbrëmja e sotme nuk do të kalojë pa ato analizat e mprehta që shpesh peshojnë më rëndë se vetë argumentet e banorëve.
Përveç “bombës” së Valdrinit, spektakli ka rezervuar edhe momente të tjera kulminante që do t’ju mbajnë mbërthyer pas ekranit. Siç raportuam paradite, Elijona do të jetë kryefjala e emocioneve me shpalosjen e linjës së saj të jetës, ndërsa Alba pritet të trondisë shtëpinë me një kërkesë të pazakontë për produksionin. E gjithë kjo dramë zhvillohet nën ethet e një televotimi të zjarrtë mes Ludos, Labit dhe këngëtarit Kushtrim Kelani. Me Valdrinin që premton “megaspektakël” dhe banorët në pikën e vlimit, bëhuni gati për një natë të gjatë. / Prive By Liberta Spahiu
