Një ngjarje e rëndë tronditi ditën e djeshme familjen e këngëtares së njohur shqiptare, Ganimete Abazi.
Nipi i saj, Lorik Abazi, vetëm 22 vjeç, është i riu që mbeti viktimë e një sulmi me thikë në orët e para të mëngjesit të së dielës në zonën e Valley Retail Park, në Croydon të Londrës. Lajmi ka prekur thellë ndjekësit e këngëtares dhe mbarë opinionin publik.
Sipas raportimeve të fundit nga policia britanike, ngjarja e përgjakshme ndodhi rreth orës 01:15 të mëngjesit. Shërbimet e urgjencës gjetën në vendngjarje tre të rinj të qëlluar me thikë. Pavarësisht ndërhyrjes së menjëhershme të mjekëve dhe transportit në spital, Lorik Abazi nuk mundi t’u mbijetonte plagëve të marra, duke ndërruar jetë pak çaste më vonë.
Në këtë incident tragjik mbetën të plagosur edhe dy të rinj të tjerë, të moshës 21 vjeçare. Njëri prej tyre raportohet se është ende në gjendje kritike për jetën, ndërsa mjekët po bëjnë të pamundurën për ta stabilizuar. Policia Metropolitane ka nisur menjëherë hetimet intensive për të zbardhur rrethanat e këtij sherri që përfundoi me vdekjen e 22-vjeçarit shqiptar.
Deri më tani, autoritetet britanike kanë arrestuar 7 persona në lidhje me rastin. Autorët e dyshuar të vrasjes janë dy vajza të moshës 25-vjeçare dhe një djalë 28-vjeçar, të cilët ndodhen në paraburgim. Motivet që çuan në këtë përleshje mbeten ende të paqarta, ndërsa hetuesit po kërkojnë ndihmën e qytetarëve që mund të kenë pamje nga kamerat e sigurisë.
Familja Abazi është e thyer nga kjo humbje e parakohshme. Loriku përshkruhet nga të afërmit si një djalë inteligjent, i kujdesshëm dhe me ëndrra të mëdha për të ardhmen. Ky lajm i hidhur vjen si një goditje e rëndë për këngëtaren Ganimete Abazi dhe rrethin e saj familjar, të cilët po përballen me dhimbjen e pashpjegueshme të humbjes së nipit të tyre në lule të rinisë. /Prive By Liberta Spahiu
