Ylli botëror me origjinë shqiptare, Bebe Rexha, u bë protagoniste e një momenti tejet interesant në rrugët e Londrës, kur u ndalua rastësisht nga influencuesi i njohur i TikTok-ut, Shan Rizwan.
Ky i fundit, i famshëm për sfidat e tij muzikore me kalimtarët, e gjeti artisten teksa ajo po shëtiste në kryeqytetin britanik së bashku me vëllanë e saj, Florentin, dhe kunatën Dorina.
Pa asnjë hezitim, Bebe pranoi sfidën e tij: nëse arrinte të identifikonte saktë tri këngë nga një prej artistëve të saj të preferuar, ajo do të fitonte 100 dollarë.
Pasi tregoi se është një fanse e madhe e legjendës Lauryn Hill, Rizwan vendosi ta vinte në provë me disa tinguj më pak të zakonshëm të artistes.
Megjithatë, Bebe tregoi menjëherë veshin e saj të mprehtë muzikor duke gjetur pa gabime këngët “That Thing”, “Ready Or Not” dhe “To Zion”.
Ndonëse doli fituese dhe i mori paratë, ajo bëri një gjest që u përshëndet gjerësisht nga ndjekësit në rrjetet sociale.
Rexha vendosi të mos i mbante 100 dollarët për vete, por ia ktheu influencuesit duke i marrë premtimin se ato do t’ia dhuronte personit të parë që do të takonte në rrugë.
Videoja, e cila tashmë është bërë virale në TikTok, shfaqi edhe një herë anën e thjeshtë dhe zemërgjerë të këngëtares, e cila pavarësisht suksesit ndërkombëtar, mbetet gjithmonë e afërt dhe spontane me fansat e saj. /Prive By Liberta Spahiu
View this post on Instagram
