Prej ditësh në rrjetet sociale po qarkullojnë zëra për një rikthim të shpejtë të Xheneta Fetahut në një tjetër format televiziv.
Pas përfundimit të angazhimit të saj të fundit si opinioniste në emisionin “Big Talk”, duket se ajo mund të jetë një nga banoret e ardhshme të reality show-t Ferma VIP. Xheneta, e cila rrugëtimin e saj si banore në Big Brother VIP Kosova e ka përfunduar që vitin e kaluar, tashmë po përflitet si një nga emrat kryesorë të kastit të ri.
Ky edicion i “Fermës” pritet të nisë më 20 mars dhe vjen me ndryshimin e prezantueses, pasi këtë herë do të jetë nën drejtimin e Arbana Osmanit.
Lidhur me këto lajme, vetë Xheneta ka bërë një reagim në llogarinë e saj në Instagram. Gjatë një bisede virtuale, kur u pyet drejtpërdrejt nga një ndjekës nëse është e vërtetë që do të marrë pjesë në këtë emision, ajo zgjodhi të mos japë një përgjigje të prerë. Xheneta postoi vetëm një “Hmmmmmmmm”, duke e shoqëruar reagimin me një fotografi ku shfaqet e veshur me një kapele prej kamoshi. Ky është një detaj vizual tipik që përshtatet mjaft mirë me tematikën e programit.
Në formatet televizive dhe dinamikat e showbiz-it, personazhet publike shpesh zgjedhin të mos u përgjigjen pyetjeve direkte për të ruajtur kuriozitetin para zbulimit të kastit zyrtar.
Edhe në këtë rast, mungesa e një mohimi të qartë po lexohet nga shumë ndjekës si një pohim i heshtur. Mbetet për t’u parë në javët në vijim nëse Xheneta do t’i bashkohet vërtet sfidave të këtij formati. /Prive By Liberta Spahiu
