Ish-banorja e këtij edicioni të “Big Brother VIP Kosova”, Sasa Hoda, ishte e ftuara e radhës në emisionin Prive By Liberta Spahiu.
Në rubrikën “Koment për Koment”, ajo u përball me mendimet e drejtpërdrejta dhe shpeshherë thumbuese të ndjekësve, duke mos kursyer përgjigjet për asnjë pyetje, që nga jeta private e deri te karriera e saj e dikurshme në politikë.
Një vëmendje të madhe morën komentet që lidheshin me rrugëtimin e saj televiziv dhe marrëdhëniet me personazhet e tjerë të ekranit, përfshirë Kushtrimin dhe detaje nga eksperienca në BBVK.
Megjithatë, ajo që ndezi më shumë debat ishte e kaluara e saj politike, një temë që ka qenë nën llupën e kritikëve që nga hyrja e saj në shtëpinë më të famshme në Kosovë.
Shumë ndjekës shpërthyen në rrjetet sociale duke vënë në dyshim kompetencën e saj në këtë fushë. Njëri prej komenteve ishte mjaft i ashpër: “O s’je ti bre për politikë, kush u kanë ai që të ka thanë? Qysh ja kemi jep votën?”. Ky reagim pasqyronte skepticizmin e një pjese të publikut mbi angazhimin e saj publik para se të bëhej pjesë e formatit argëtues.
Ajo sqaroi se angazhimi i saj në politikë nuk ka qenë rastësor apo i përkohshëm. “Kam qenë dy mandate asambleiste,” u shpreh ajo, duke rikujtuar se ka pasur besimin e qytetarëve për një kohë të gjatë, megjithatë konfirmoi se tashmë ajo kapitull është mbyllur dhe nuk është më pjesë aktive e skenës politike. /Prive By Liberta Spahiu
