Hygerta Sako, e cila arriti të prekë finalen e rrugëtimit të saj në Big Brother, ka vendosur t’u përgjigjet drejtpërdrejt komenteve të atyre që e kanë etiketuar si “bukuroshja e fjetur” e këtij edicioni. Gjatë një komunikimi me ndjekësit në llogarinë e saj në Instagram, ajo është pyetur hapur nga një ndjekës se pse mendon që publiku e votoi për të shkuar në finale, kur të gjithë e komentonin se kishte shkuar deri aty duke fjetur gjumë dhe pa bërë debate.
Përgjigjja e Hygertës ka qenë e qartë dhe e prerë, duke shpjeguar se dinamikat e saj brenda shtëpisë janë perceptuar ndryshe nga publiku besnik i programit. Ajo theksoi se ata që e kanë ndjekur live 24 orë në 24 e kanë kuptuar fare mirë që ajo vetëm e fjetur nuk ishte. Sipas ish-banores, ajo ka qenë aktive çdo ditë duke folur, diskutuar, debatuar, analizuar dhe argumentuar rreth situatave të ndryshme.
Më tej, ajo argumentoi zgjedhjen e saj për të mos u përfshirë në dinamika banale apo agresive. Hygerta pranoi me krenari se nuk ka bërë “paradë mode”, nuk ka flirtuar, nuk ka bërë intriga dhe nuk ka ulëritur e bërtitur pa lidhje nëpër shtëpi.
Duke mbrojtur karakterin e saj dhe strategjinë që ndoqi, ajo u shpreh se nëse e gjithë kjo qetësi dhe mungesë drame konsiderohet “gjumë”, atëherë ajo është plotësisht në rregull me këtë fakt.
Në fund të mesazhit të saj, finalistja pati edhe një përgjigje ironike për të gjithë kritikët. Ajo deklaroi se epiteti “bukuroshja e fjetur” vlen vetëm për ata persona që marrin kompetencën të flasin e ta gjykojnë bazuar vetëm në klipet e shkurtra dhe të prera që qarkullojnë nëpër rrjete sociale, dhe jo në lojën e saj të plotë.
Me këtë reagim, Hygerta mbylli një herë e mirë diskutimet mbi qëndrimin e saj, duke dëshmuar se një lojë e fortë mund të bëhet edhe pa zhurmë të tepruar. /Prive By Liberta Spahiu
