Aktorja e njohur e kinematografisë dhe serialeve turke, Saadet Işıl Aksoy (e njohur për publikun shqiptar si “Sadika” nga seriali legjendar Sulejmani i Madhërishëm), i ka dhënë fund martesës së saj. Ajo dhe bashkëshorti i saj, Pamir Kıraner, me të cilin u kurorëzua në vitin 2014, kanë ndarë rrugët e tyre përfundimisht.
Sipas gazetares së njohur turke Birsen Altuntaş, çifti, i cili prej disa kohësh jetonte i ndarë, i ka dhënë fund martesës 12-vjeçare edhe nga ana ligjore. Mësohet se dyshja është divorcuar në heshtje të plotë dhe me vetëm një seancë gjyqësore. Kujtojmë se në vitin 2020, ata u bënë prindër për herë të parë pasi mirëpritën në jetë vajzën e tyre, Marisa Gürcan.
Zërat për një krizë në çift kishin nisur prej kohësh. Që në muajin qershor të vitit të kaluar, aktorja u ishte përgjigjur thashethemeve për ndarje, duke lënë të kuptohej se diçka nuk shkonte. Ajo tregoi se kthimi i saj përfundimtar nga SHBA-ja në Turqi lidhej pikërisht me ndryshimet në jetën private.
“Arsyeja e kthimit tim përfundimtar në Turqi është pak a shumë kjo. Por nuk dua të flas shumë për këtë temë,” ishte shprehur Aksoy asokohe, duke dhënë sinjalet e para të divorcit.
Deri më tani, pas mbylljes së procedurave ligjore, asnjëri prej tyre nuk ka bërë një deklaratë zyrtare për mediat. /Prive By Liberta Spahiu
View this post on Instagram
