Pushimet në Dubai zakonisht nënkuptojnë diell, plazh dhe jetë luksi, por për fituesin e Big Brother VIP Kosova 3, Drilon Rama, ky udhëtim ka marrë një kthesë krejt tjetër dhe aspak të këndshme.
Prej disa ditësh, ai ka mbetur i izoluar në Emiratet e Bashkuara Arabe për shkak të situatës së tensionuar dhe zhvillimeve alarmante në Lindjen e Mesme, duke e bërë të pamundur kthimin e tij në Kosovë pas pezullimit të fluturimeve. Ndërkohë që ndjekësit prisnin ta shihnin kudo nëpër intervista pas finales së madhe, realiteti i tij aktual është kthyer në një situatë tepër stresuese.
Së fundmi, Driloni ka ndarë një pamje në Instagram nga ekrani i telefonit të tij, duke treguar qartë njoftimet e pazakonta me të cilat po zgjohet atje.
Ai ka publikuar alarmin emergjent të sigurisë ku autoritetet i njoftojnë qytetarët duke u shkruar: “Për shkak të situatës aktuale, një kërcënim i mundshëm nga raketat, kërkoni strehim të menjëhershëm në ndërtesën e sigurt më të afërt dhe qëndroni larg dritareve, dyerve dhe zonave të hapura. Prisni për udhëzime të mëtejshme”.
Për të përshkruar këtë realitet të ri, ish-banori i BBVK ka shtuar një mbishkrim sipër fotos ku thotë vetëm: “Alarmi im çdo mëngjes”.
Edhe pse rrethanat janë padyshim sfiduese dhe të rrezikshme, Driloni është munduar të mbajë komunikimin me ndjekësit e tij për t’i qetësuar se është në vende të sigurta, në pritje të normalizimit të trafikut ajror për t’u rikthyer më në fund në Prishtinë. /Prive By Liberta Spahiu
