Menduam se i kishim parë të gjitha në televizionin shqiptar, por drama më e fundit në studion e “Për’puthen” sapo rishkroi rregullat e romancave televizive.
Katerina dhe Arnoldi, një nga dyshet më të komentuara të programit, u rikthyen dje në emision për të dhënë atë që zakonisht duhej të ishte lajmi më i bukur: Katerina është në pritje të ëmbël. Por mbajini urimet, sepse këtu situata merr një kthesë totalisht të papritur dhe aspak të zakontë. Në vend të një fundi të lumtur si në përralla ku çifti feston rritjen e familjes, Arnoldi ka lëshuar një deklaratë të ftohtë akull që po bën xhiron e rrjetit kudo: “Fëmija është bekim, por ndjenja nuk kam…”
E lexuat mirë! Dhe sikur kjo bombë të mos mjaftonte për të shokuar opinionin publik dhe ndjekësit e programit, çifti ka pranuar hapur se marrëdhënia e tyre jashtë kamerave është një kaos i vërtetë. Arnoldi e përshkroi bashkëjetesën e tyre si jashtëzakonisht të vështirë, duke theksuar pa dorashka se ata janë “toksikë” me njëri-tjetrin. Për ta bërë këtë telenovelë edhe më dramatike, u zbulua se Katerina ende nuk ka takuar familjarët e Arnoldit për shkak të disa debateve të forta mes dy familjeve. Moderatorja Megi Pojani u detyrua t’i kthente të dy me këmbë në tokë gjatë transmetimit, duke i kujtuar me tone të prera se tashmë njohja e tyre vjen në plan të dytë, pasi prioriteti absolut duhet të jetë vetëm fëmija.
Komentet në rrjetet sociale kanë shpërthyer me kritika të ashpra ndaj çiftit, ku ndjekësit i akuzojnë ata se po përdorin një foshnjë të pafajshme për “show” dhe për pak më shumë vëmendje. Mbetet për t’u parë nëse kjo dyshe kontroverse do të gjejë gjuhën e përbashkët për hir të bebes që po vjen në jetë, apo nëse ky është vetëm fillimi i një drame të gjatë që sapo ka nisur. /Prive By Liberta Spahiu
