E ftuar në emisionin “Me Meriton Mjekiqin”, artistja e njohur Fjolla Morina ka hapur arkivat e jetës së saj, duke u rrëfyer si rrallëherë më parë.
Përmes një interviste tejet emocionale, ajo ka ndarë detaje që nga traumat e fëmijërisë e deri te përballja me drejtësinë, duke mos lënë anash as eksperiencën e saj në Big Brother VIP Kosova.
Një nga momentet më drithëruese të bisedës ishte kujtimi për babain e saj, të cilin e humbi kur ishte vetëm 12 vjeçe.
Fjolla tregoi se ishte shumë e lidhur me të dhe se kjo humbje i ndryshoi jetën përgjithmonë, duke theksuar se pas vdekjes së tij, bota e saj u përmbys dhe iu desh të rritej para kohe.
Artistja rrëfeu se e ëma mori rolin e të dy prindërve, duke u bërë shtylla e saj kryesore, megjithëse pranoi se mungesa e dashurisë atërore ka mbetur një zbrazëti që e ndjek edhe sot.
Lidhur me qëndrimin brenda shtëpisë së Big Brother VIP Kosova, Fjolla sqaroi se ky vendim erdhi pas një pauze të gjatë.
Qëllimi i saj kryesor ishte t’u tregonte fansave se ajo është mirë dhe të rigjente veten në sytë e publikut.
Ajo vlerësoi maksimalisht produksionin për përkujdesjen dhe e cilësoi si një eksperiencë tejet pozitive që i shërbeu për mirë.
Për herë të parë, Fjolla foli hapur edhe për dy muajt e kaluar në burgun e Lipjanit, një periudhë që e përshkroi si tejet të rëndë emocionalisht dhe si periudhën më të keqe të jetës së saj.
“Ajo eksperiencë është një eksperiencë e keqe e jemja, të cilën unë e kam tejkaluar shumë rëndë. Si artiste më ndodhi, edhe pse nuk është marre, sepse unë mbi të gjitha nuk kam hyrë aty për ndonjë gjë të keqe që kam bërë,” deklaroi ajo, duke lënë të kuptohet se kjo mbetet pika më e errët në rrugëtimin e saj.
Ky rrëfim i sinqertë i Fjollës ka pushtuar menjëherë rrjetet sociale, duke dëshmuar edhe një herë se pas imazhit të “femrës së fortë”, fshihen sfida të mëdha jetësore që publiku nuk i kishte njohur deri më sot. /Prive By Liberta Spahiu
