Ylli botëror i muzikës, Céline Dion, ka njoftuar rikthimin e saj të shumëpritur në skenë, katër vite pasi u diagnostikua me një sëmundje të pashërueshme që i preku zërin dhe aftësinë për të ecur. Këngëtarja e njohur për hitet e pavdekshme si “My Heart Will Go On” dhe “Because You Loved Me”, do të mbajë plot 10 koncerte në arenën “Paris La Défense”, e cila ka një kapacitet prej 40,000 vendesh, gjatë muajve shtator dhe tetor.
Njoftimi emocionues erdhi pikërisht në ditën e ditëlindjes së saj të 58-të. Përmes një mesazhi në llogarinë e saj në Instagram, Dion e quajti këtë rikthim “dhuratën më të mirë të jetës sime”. Ajo u shpreh e gatshme dhe e fortë për këtë hap të ri, duke u thënë fansave se ndihet e emocionuar, por natyrisht edhe paksa e tensionuar.
Duke folur hapur për betejën me shëndetin, Dion theksoi se po bën progres të jashtëzakonshëm dhe po e menaxhon mirë situatën. Ajo zbuloi me gëzim se ka filluar të këndojë sërish, madje edhe të kërcejë pak. Artistja shfrytëzoi rastin për t’i dhënë një mesazh falënderimi publikut, duke theksuar se gjatë këtyre viteve të vështira ka ndier lutjet, mbështetjen, mirësinë dhe dashurinë e tyre në çdo ditë që ka kaluar.
Céline Dion, e cila mbetet një nga artistet më të shitura të të gjitha kohërave, nuk ka performuar në një koncert të sajin që nga data 8 mars 2020 në Newark, New Jersey. Turneu i saj “Courage” u ndërpre fillimisht nga shpërthimi i pandemisë, dhe më pas, diagnostikimi me Sindromën e Personit të Ngurtë (Stiff Person Syndrome) e detyroi atë të anulonte të gjitha shfaqjet e ardhshme.
Për këtë rikthim live, datat e 10 koncerteve janë të ndara nga njëra-tjetra me disa ditë diferencë, me gjasë për të shmangur sforcimin fizik dhe për të mbrojtur shëndetin e saj. Biletat do të dalin në shitje më 7 prill dhe, megjithëse kërkesa pritet të jetë e jashtëzakonshme, fansat mund të regjistrojnë interesin e tyre në faqen e saj zyrtare që sot, e martë, 31 mars. /Prive By Liberta Spahiu
