Reperi i njohur, Fero, ka ndarë një mesazh të gjatë me ndjekësit e tij në rrjetet sociale, ku ka shpjeguar disa nga vështirësitë me të cilat është përballur kohët e fundit dhe ka zbuluar planin e ri për publikimin e projekteve të tij të shumta muzikore.
Përmes një deklarate në InstaStory, ai ka qenë mjaft i hapur me fansat, duke pranuar se gjatë vitit të kaluar ka pasur vështirësi për të publikuar gjithë muzikën që ka shkruar. Fero renditi disa nga arsyet që e kanë penguar, duke përfshirë neglizhencën ndaj vetes, mbingarkesën nga turnetë e shumta, si dhe përballjen me çështje të komplikuara ligjore. (Duke mos iu referuar direkt përballjeve ligjore me ish-bashkëshorten, Arbeniten.)
Megjithatë, Fero theksoi se krijimtaria e tij nuk ka ndalur për asnjë moment. “Muzika është pasioni im, dhe pavarësisht se si ndihesha, kam vazhduar të shkruaj çdo ditë të vetme,” shprehet ai, duke treguar se thjesht nuk ka dashur të nxitohet për të nxjerrë materialet e reja.
Për të kompensuar këtë periudhë dhe për të kënaqur fansat, reperi ka zbuluar strategjinë e tij të re. Ai njoftoi se tashmë do të fillojë të publikojë nga një këngë çdo dy javë. Sipas Feros, ky ritëm i ri publikimesh është vetëm një pjesë e vogël e atyre që ai ka planifikuar të sjellë gjatë këtij viti.
Në fund të mesazhit të tij, Fero shprehu mirënjohje të thellë për mbështetësit, duke i falënderuar për durimin e treguar dhe duke vlerësuar lidhjen e krijuar me ta gjatë dekadës së fundit.
/Prive By Liberta Spahiu
