E mbani mend Taynën e fillimeve që sillte një energji të papërballueshme që në rreshtat e parë të tekstit? Epo, ajo vajzë sapo u rikthye, por këtë herë me një pjekuri krejtësisht tjetër.
Vetëm pak minuta më parë, artistja lançoi projektin e saj më të ri të titulluar “Muza”, dhe nga sa po shohim e dëgjojmë, kjo nuk është thjesht një këngë e radhës për të mbushur algoritmet. Në fakt, ky projekt e rikthen artisten drejtpërdrejt tek rrënjët e saj origjinale por tashmë e sjellë në një version dukshëm të përmirësuar dhe shumë më “upgrade” në çdo detaj.
Tayna po tregon se nuk e ka humbur fare fokusin dhe qëndrimin që e karakterizon. Për muzikën e këtij projekti, artistja i ka besuar bashkëpunëtorit të saj, producentit Mixey, ndërsa teksti mban tërësisht firmën e vetë reperes. E gjithë paketa vizuale është kuruar nga Noname Department me regji të Marie Beriestain.
Lëshimi i “Muza” vjen zyrtarisht nën ombrellën e labelit Pendragon dhe me shpërndarje nga 360 Media, duke shënjuar kështu një kapitull të ri, të strukturuar mirë dhe me baza të forta për të ardhmen.
Me shikimet dhe komentet që po shtohen me shpejtësi që në minutat e para të premierës në YouTube, duket qartë se publiku e kishte ndjerë mungesën e kësaj lloj Tayne. Ky nuk është një rikthim që ka nevojë për zhurmë artificiale apo hiperbola, por një lëvizje e zgjuar dhe e llogaritur mirë që tregon se kur talenti i kthehet bazës, rezultati flet vetë. /Prive By Liberta Spahiu
