Këngëtarja e njohur Nora Istrefi ka befasuar publikun duke publikuar Ep-in, i cili përbëhet nga katër këngë të reja.
Të publikuara nga shtëpia diskografike Folé Publishing, këto projekte sjellin emocion përmes baladave me tekste të ndjera, duke i bërë për vete dëgjuesit që në notat e para.
Qershia mbi tortë e këtij projekti është padyshim rikthimi i bashkëpunimit me artistin e njohur Sinan Vllasaliu.
Kënga e tyre, e titulluar “Paralele”, rikthen kiminë mes dy artistëve, duke ofruar një interpretim që publiku e do aq shumë.
Krahas këtij dueti, EP-ja përmban edhe këngët “Amani” (në bashkëpunim me Muharrem Ahmetin), si dhe dy projekte solo “Ja keni ditë” dhe “Buzën e thatë”.
Përtej interpretimit, pesha e këtij projekti qëndron te vargjet e zgjedhura me mjeshtëri. Për të jetësuar emocionin e këngëve “Paralele” dhe “Ja keni ditë”, Nora i ka besuar penës së kantautorit të njohur Ilir Berani, i cili i ka dhënë një thellësi të veçantë këtyre baladave. Ndërkohë, kënga “Buzën e thatë” mban tekstin e shkruar nga reperi dhe tekstshkruesi Elinel.
Ajo që e bën këtë projekt të dallohet është niveli i lartë skenik dhe vizual që Nora ka arritur. Performancat e saj në këto videoklipe sjellin një elegancë të rafinuar. Koncepti vizual, i ngjashëm me një performancë të drejtpërdrejtë teatrale, shoqëruar me një prani skenike dominuese por plot finesë, e lartëson profilin e saj. Ky EP dëshmon qartë se Nora Istrefi di të ruajë balancën mes estetikës së kuruar dhe një paraqitjeje artistike me peshë e dinjitet.
/Prive By Liberta Spahiu
