Tayna po vazhdon të zgjerojë shtrirjen e saj përtej tregut muzikor shqiptar me projektin e fundit.
Vetëm pak ditë pas publikimit, kënga e saj e re e titulluar “Vena” ka filluar të regjistrojë pozicionime të rëndësishme në platformat digjitale ndërkombëtare. Të dhënat nga platforma Spotify tregojnë se brenda dy ditëve të para, ky projekt është përfshirë direkt në listat kryesore të dëgjueshmërisë jashtë vendit, duke shënuar një hap të rëndësishëm për profilin e saj.
Më konkretisht, “Vena” është pozicionuar në listat zyrtare “New Music Friday” për shtetet e Zvicrës dhe Gjermanisë. Ky klasifikim në dy prej tregjeve kryesore evropiane përfaqëson një zgjerim të konsiderueshëm të audiencës së saj, duke u evidentuar organikisht në sugjerimet muzikore të këtyre territoreve dhe duke rritur dukshmërinë e saj ndërkombëtare tek një publik më i gjerë. Kjo vërteton që interesi për muzikën e saj po i kalon kufijtë rajonalë.
Ky progres në klasifikime vjen në një moment mjaft strategjik për karrierën e saj, duke pasur parasysh që ky publikim nuk është thjesht një këngë e radhës. “Vena” është një projekt që vjen si pjesë e albumit të saj të ri të paralajmëruar. Përfshirja e kësaj kënge në këto toplista rrit automatikisht interesin e audiencës për ecurinë e materialit të plotë që pritet të publikohet, duke konfirmuar edhe një herë se artistja ka ndërtuar një strategji të mirëmenduar për këtë gur të rëndësishëm në karrierë. /Prive By Liberta Spahiu
