Bota e kinematografisë po përjeton një moment historik me shfaqjen e filmit biografik “Michael”, i cili ka thyer çdo parashikim që në javët e para të publikimit.
Ky produksion madhështor, me një buxhet rekord prej mbi 150 milionë dollarësh, ka arritur të rikthejë magjinë e Michael Jackson në ekranin e madh, duke u shndërruar në një ngjarje globale.
Filmi ka arkëtuar plot 217 milionë dollarë në nivel global që nga publikimi të mërkurën, duke lënë pas rekordet e mëparshme të këtij zhanri dhe duke u bërë kryefjala e bisedave kudo.
Kryefjala e këtij suksesi është padyshim Jaafar Jackson, nipi i vetë Michael, i cili ka dhënë një performancë rrëqethëse, duke mishëruar me saktësi zërin, lëvizjet dhe emocionet e xhaxhait të tij.
Shifrat e fitimeve janë marramendëse; filmi ka lënë pas biografitë e suksesshme si “Bohemian Rhapsody” dhe “Elvis”, ndërsa ekspertët parashikojnë që ai të kalojë shifrën magjike prej 1 miliard dollarësh në arkat globale.
Përtej suksesit financiar, filmi i drejtuar nga Antoine Fuqua vlerësohet lart për saktësinë historike, duke trajtuar me kujdes çdo etapë të jetës së yllit, nga fëmijëria me “Jackson 5” deri te suksesi i padiskutueshëm i albumit “Thriller”.
Me një kolonë zanore që përfshin mbi 30 këngë të ripunuara për sistemet më moderne të zërit, projekti po konsiderohet që tani si kandidati kryesor për çmimet “Oscar”.
Pas këtij suksesi të jashtëzakonshëm, qarqet e Hollywood-it kanë nisur të ziejnë: po përflitet seriozisht për realizimin e “Michael 2”.
Burime pranë produksionit dhe njerëz të afërt me familjen Jackson kanë lënë të kuptohet se projekti aktual është vetëm fillimi i një sage më të madhe kinematografike.
Ky lajm ka marrë dhenë pasi u bë e ditur se materiali i mbledhur gjatë xhirimeve dhe pasuria e pafundme e historisë së Mbretit të Pop-it nuk mund të përmblidhen në vetëm një film. /Prive By Liberta Spahiu
