Aktori Jul Deda i ka mohuar prerë zërat që po qarkullojnë së fundmi lidhur me largimin e tij nga emisioni “Fiks Fare” dhe akuzat se pas një faqeje anonime në Instagram që sulmon kolegët qëndron ai. Përmes një postimi në InstaStory, ai u shpreh i tronditur nga ato që ka lexuar, duke e quajtur të gjithë historinë të pavërtetë.
Reagimi i tij vjen pas shkrimeve të publikuara nga ‘Prapaskena’, ku pretendohej se Deda po hetohet nga Krimi Kibernetik në Policinë e Shtetit për fyerje dhe shantazh.
Sipas këtyre pretendimeve, ai kishte përdorur email-in e tij personal për të hapur faqen “ON/OFF TV”, ku publikoheshin shkrime kundër figurave të Top Channel, TV Klan e Syri TV. Përveç kësaj, në to aludohej se largimi i tij lidhej edhe me vese të bixhozit.
Për t’u përgjigjur publikisht, Deda zgjodhi të shkruante këtë mesazh:
“Është shumë e rëndë të dëgjoj apo të lexoj këto fjalë për mua. E përgënjeshtroj këtë fakt me gjithë fuqinë time. Nuk do guxoja kurrë ta bëja këtë, aq më tepër për vendet ku kam punuar dhe jetuar, aq më tepër për kolegët me të cilët kam punuar. Edhe një herë, e përgënjeshtroj, se më shumë s’di çfarë të bëj në këtë vend. Kush më beson mirë, kush nuk më beson s’kam çfarë të bëj. Faleminderit për mirëkuptimin.”
Në fjalët e aktorit vihet re qartë një dozë e fortë zhgënjimi dhe lodhjeje nga kjo situatë. Më shumë se sa një sqarim zyrtar apo me argumente teknike, mesazhi i tij thekson se nuk do të hidhte kurrë poshtë vitet e punës dhe marrëdhëniet me kolegët.
Ajo që bie më shumë në sy është ndjesia e pafuqisë përballë shpifjeve, sidomos kur shprehet se “s’di çfarë të bëj më në këtë vend”.
Deda zgjodhi ta mbyllë deklaratën pa e zgjatur, duke ia lënë në dorë vetë publikut për të gjykuar se ku qëndron e vërteta.
/Prive By Liberta Spahiu
