Aktorja indiane Sara Khan, të cilën shqiptarët e njohin si “Sadna” nga seriali i dikurshëm “Bidai”, ka reaguar për protestat në Shqipëri.
Përmes një postimi të gjatë në Instagram, ajo u është drejtuar shqiptarëve me fjalë të ndjera, duke kujtuar fillimisht dashurinë që ka marrë nga publiku ynë ndër vite.
“Të dashur shqiptarët e mi, ju më mirëpritët në shtëpitë tuaja si Sadna dhe më dhuruat aq shumë dashuri, saqë gjuha dhe distanca nuk dukeshin se kishin rëndësi. Atë dashuri e kam mbajtur me vete që atëherë”, ka shkruar aktorja.
Por këtë herë, Sara kishte diçka tjetër në mendje. Pamjet nga protestat dhe shqetësimi për të rinjtë shqiptarë e kanë shtyrë të ndajë një mesazh mbështetës.
“Sot, zemra ime është e rënduar duke menduar për ju, veçanërisht për të rinjtë, shpresat e tyre dhe familjet që presin të kthehen të sigurt në shtëpi”, ka vazhduar ajo.
Aktorja ka folur edhe për frikën dhe pasigurinë me të cilën po përballen të rinjtë, duke theksuar se ata meritojnë të dëgjohen dhe të kenë mundësi ta ndërtojnë të ardhmen në vendin e tyre.
“Çdo i ri meriton të dëgjohet, të trajtohet me butësi dhe dinjitet, dhe të besojë se ka vend për ëndrrat e tij në shtëpinë e vet”, ka shkruar Sara.
Në fund, ajo u është drejtuar edhe prindërve që shqetësohen për fëmijët e tyre.
“Për çdo prind të shqetësuar, çdo të ri të frikësuar dhe këdo që po kalon vështirësi në heshtje, ju jeni në mendimet dhe lutjet e mia. Ju bëtë që dikush kaq larg të ndihej si njëri prej jush. Dua ta dini se dhimbja juaj nuk më duket aspak e largët.”
Mesazhin e ka mbyllur me fjalët “Me dashuri dhe një lutje për ditë më të buta. Sadna juaj”, duke vendosur një zemër të bardhë dhe flamurin shqiptar.
Edhe pse kanë kaluar vite nga koha kur “Bidai” transmetohej në ekranet shqiptare, duket se Sara nuk e ka harruar dashurinë që ka marrë nga ky publik. Dhe këtë herë, ishte ajo që zgjodhi t’u qëndrojë pranë shqiptarëve, qoftë edhe nga larg. /Prive By LS
