Një adoleshent influencer që po përpiqej të realizonte një fluturim historik i vetëm rreth botës është ndaluar nga autoritetet pasi thuhet se ka zbritur pa leje në Antarktidë.
Piloti amerikan me prejardhje aziatike Ethan Guo, 19 vjeç, ka qenë në një udhëtim rreth globit me qëllim “të bëhet personi i parë në histori që fluturon i vetëm në të shtatë kontinentet me një avion të vogël dhe të mbledhë 1 milion dollarë për kërkime kundër kancerit,” sipas një mesazhi në faqen e tij zyrtare.
Vendimin për këtë sfidë e mori pasi një kushëri i tij u diagnostikua me kancer në vitin 2021, thuhet në postim. Guo, i cili ka dokumentuar udhëtimet e tij në rrjetet sociale, numëron 1.3 milion ndjekës në Instagram.
Sipas CNN, Guo u ndalua nga autoritetet kiliane të shtunën, më 28 qershor, pasi pretendohet se kishte paraqitur një plan fluturimi të rremë pas nisjes nga Aeroporti Carlos Ibáñez del Campo në qytetin jugor kilian të Punta Arenas.
Ai ishte pasagjeri i vetëm në bordin e një avioni Cessna 182Q, me regjistrim N182WT, i cili dyshohet se ka devijuar nga kursi drejt Antarktidës.
Prokuroria e Magallanes dhe Antarktidës Kiliane konfirmoi në një postim të përkthyer në X (ish-Twitter) të dielën se “një pilot amerikan kishte paraqitur një plan fluturimi të rremë dhe kishte zbritur në një pistë në Antarktidë.”
Në përshkrimin e postimit thuhej: “Një pilot amerikan që zbriti pa autorizim në Antarktidë është akuzuar në Punta Arenas.”
“I akuzuari dha informacione të rreme tek autoriteti aeronautik. Ai dorëzoi një plan fluturimi ku thuhej se do të fluturonte mbi qytetin Punta Arenas,” deklaroi Cristian Crisosto Rifo, Prokurori Rajonal i Magallanes dhe Antarktidës Kiliane, sipas CNN.
“Megjithatë, ai vazhdoi drejt Antarktidës pa informuar askënd dhe pa asnjë autorizim, duke u ulur në fushën ajrore të bazës ‘Lieutenant Rodolfo Marsh’ në territorin kilian të Antarktidës. Me këtë sjellje, i akuzuari vuri në rrezik serioz sigurinë e trafikut ajror në Antarktidë dhe rajonin e Magallanes,” shtoi prokurori, sipas të njëjtit burim.
Crisosto deklaroi se Guo u ndalua dhe u akuzua zyrtarisht sapo mbërriti në Antarktidë.
“I akuzuari jo vetëm që shkel Kodin Aeronautik, por edhe disa rregullore kombëtare dhe ndërkombëtare që lidhen me rrugët ajrore drejt Antarktidës dhe hyrjen në kontinentin e bardhë,” tha ai.
Prokuroria konfirmoi për CNN të mërkurën, më 2 korrik, se Guo vazhdon të qëndrojë në Antarktidë, duke shtuar se për shkak të kushteve atmosferike, ende nuk është planifikuar një fluturim kthimi.
Crisosto nuk iu përgjigj menjëherë kërkesës së revistës PEOPLE për më shumë informacion.
Avokatja e Guo, Karina Ulloa, u tha gazetarëve në një konferencë për shtyp të dielën se adoleshenti kishte përjetuar “një sërë komplikimesh” ndërkohë që ishte “tashmë në ajër,” duke shtuar se “po kryente një fluturim eksplorues për të parë nëse mund të ndiqte këtë rrugë apo jo,” sipas CNN.
Sipas konfirmimit të së dielës nga Prokuroria e Magallanes dhe Antarktidës Kiliane, Guo do të qëndrojë në sektorin kilian të Antarktidës derisa të marrë leje nga autoritetet për t’u kthyer në Punta Arenas.
Më pas, ai duhet të qëndrojë në Kili gjatë një periudhe hetimore 90-ditore, e cila është urdhëruar nga gjykata kiliane, sipas CNN.
Revista PEOPLE ka tentuar të kontaktojë Ulloa-n dhe organizatën Flight Against Cancer të Guo-s për koment, por nuk ka marrë ende përgjigje.
Guo ka shprehur pasionin e tij për aviacionin në faqen e tij personale, ku shkruan:
“Pasioni im për aviacionin nisi që në moshën 13-vjeçare. Mora licencën e pilotit privat në moshën 17-vjeçare. Jam i certifikuar për fluturime me instrumente (IFR), që do të thotë se mund të fluturoj vetëm me instrumente, pa pasur nevojë për shikim të terrenit. Kam fluturuar në të 48 shtetet e bashkuara të SHBA-së dhe kam kaluar Atlantikun tre herë, duke grumbulluar mbi 700 orë fluturimi.”
Guo e nisi sfidën e tij me shtatë kontinente nga Memphis, Tennessee, para se të udhëtonte në New Jersey, sipas një postimi në Instagram më 24 shtator 2024. Deri tani ai ka vizituar vende si Dubai, Pakistani, Australia, dhe shumë të tjera./Prive By Liberta Spahiu
